आमच्या कार्यकर्त्यांची पाठराखण करणे काही गैर नाही; भाजपकडून पवार प्रकरणातील आरोपीची पाठ पाठराखण

अमरावती: उद्धव ठाकरे हे पुन्हा मुख्यमंत्री होण्याचे स्वप्न पाहत आहेत. त्यांना दंगली घडवून आणायच्या आहेत का? याचा शोध घेतला पाहिजे. सध्याचे कार्यक्रम थोडे बंद करण्यास उद्धव ठाकरे यांना संजय राऊत यांनी सांगितले पाहिजे, असेही नीतेश राणे यावेळी म्हणाले. ते अमरावती येथे पत्रकारांशी बोलत होते.

राष्ट्रवादी काँग्रेसचे नेते शरद पवार यांना जीवे मारण्याची धमकी मिळणे ही दुर्दैवी बाब आहे. मात्र त्यांना धमकी देणारा हा अमरावती शहरातला आमचा भाजपचा कार्यकर्ता असल्याचे आता सांगण्यात येत आहे.

पोलिसांनी अद्याप कुठलीही चौकशी केली नसताना राष्ट्रवादी काँग्रेसच्या अनेक नेत्यांनी आमच्या कार्यकर्त्यांचे फोटो समाजमाध्यमावर व्हायरल केले.

दाऊद इब्राहिमला साथ देणाऱ्या नवाब मलिक यांच्याबाबत आपुलकी आणि प्रेम ते लोक बाळगू शकतात, मग आम्ही आमच्या कार्यकर्त्यांची पाठराखण करणे काही गैर नाही, असेही राणे यावेळी म्हणाले.

संजय राऊत यांना जीवे मारण्याची धमकी आदित्य ठाकरे शिवाय दुसरा कोणी देऊ शकत नाही. ठाकरेंच्या घरी नोकरी करणारे राऊत हे आदित्य ठाकरे यांना नको आहेत, असे देखील त्यांनी सांगितले. कोल्हापूर दंगलीच्या मास्टरमाइंडला शोधून त्यांना तातडीने अटक करावी.

शिवाजी महाराजांच्या राज्यात औरंगजेबाचे उदात्तीकरण यापुढे सहन केले जाणार नाही. छत्रपती शिवाजी महाराज यांना मानणारे हे महाराष्ट्र राज्य आहे. या महाराष्ट्र राज्यात औरंगजेबाचे फोटो घेऊन नाचणाऱ्यांना धडाच शिकवला पाहिजे, असेही ते म्हणाले.

शरद पवार यांना आलेल्या धमकीच्या प्रकरणात जो कोणी दोषी आढळेल त्यांना निश्चितच शिक्षा होईल. हे सरकार उद्धव ठाकरेंचे नाही, आता आमचे गृहमंत्री देवेंद्र फडणवीस हे महाराष्ट्राच्या सुरक्षेसाठी दक्ष आहेत, असेही ते म्हणाले.