Sharad Pawar: बालेकिल्ल्यावर पवार मिळवणार पुन्हा विजय? राजन पाटलांनंतर, आमदार बबन शिंदे दुसऱ्यांदा शरद पवार यांच्या भेटीला

गेल्या वर्षी जुलैमध्ये अजित पवार यांच्यासह 40 आमदारांनी भाजपबरोबर हातमिळवणी करत महायुती सरकारमध्ये प्रवेश केला होता. त्यानंतर पुढे शरद पवार यांना पक्षाचे नाव आणि चिन्ह गमवावे लागले होते.

पुढे झालेल्या लोकसभा निवडणुकीत नवा पक्ष आणि चिन्हासह शरद पवार यांनी दमदार यश मिळवत 8 खासदार निवडून आणले. पवार यांच्या या यशामुळे अजित पवार यांच्याबरोबर गेलेल्या आमदारांमध्ये अस्वस्थता निर्माण झाली आहे. अशात आता राष्ट्रवादीचे अनेक आमदार पुन्हा एकदा शरद पवार (Sharad Pawar) यांच्याकडे वळत असल्याचे पाहायला मिळत आहे.

दरम्यान विधानसभा निवडणुकीच्या तोंडावर अजित पवार यांच्या राष्ट्रावादीतील अनेक आमदार शरद पवार यांच्याशी संपर्क साधत आहेत. यामध्ये सोलापूरातील राष्ट्रावादीचे आमदार आणि नेत्यांचा समावेश सर्वाधिक आहे.

काल मोहोळचे माजी आमदार राजन पाटील यांनी अकलूज येथे शरद पवार यांच्या भेट घेतल्यानंतर आज, राष्ट्रवादीचे माढ्याचे आमदार बबन शिंदे यांनी पुण्यातील मोदी बाग येथे शरद पवार यांच्या भेटीसाठी दाखल झाले आहेत.

गेल्या काही दिवसांत बबन शिंदे दुसऱ्यांदा शरद पवार यांच्या भेटीसाठी मोदी बागेत आल्याने ते उपमुख्यमंत्री अजित पावर यांची साथ सोडणार असल्याच्या चर्चा राजकीय वर्तुळात सुरू झाली आहे.

पवार पुन्हा जिंकणार बालेकिल्ला?

लोकसभा निवडणुकीत मोहीते-पाटील कुटुंबाला पुन्हा पक्षात आणत पवारांनी माढा पुन्हा जिंकला. तर पवार आता विधानसभेतही त्यांचा बालेकिल्ला असलेला सोलापूर जिल्हा पुन्हा जिंकण्यासाठी जुळवाजुळव करत आहेत.

यासह पक्ष सोडून गेलेले अनेकजन पुन्हा पवार यांच्या राष्ट्रवादीत येणास उत्सक आहेत. यामध्ये मोठ्या नावांचाही समावेश आहे.

दरम्यान गेल्या काही काळात पंढरपूरमधून आमदारकी लढवलेले भगिरथ भालके, मोहळचे माजी आमदार रमेश कदम, माढ्याचे आमदार बबन शिंदे, माजी आमदार राजन पाटील यांनी शरद पवार यांची भेट घेतली आहे.

हे सर्व नेते, आमदार शरद पवार यांना भेटत असल्यामुळे ते पुन्हा स्वगृही येण्याच उत्सुक असल्याचे बोलले जात आहे. जर हे सर्व नेते बरोबर आल्यास शरद पवार पुन्हा एकदा बालेकिल्ला असलेल्या सोलापूर जिल्ह्यावर विजय मिळवणार का हे पाहणे औत्सुक्याचे ठरणार आहे.