Maharashtra Politics: 'तू कोण आहे....', एकेरी उल्लेख करत श्रीकांत शिंदेंचा आदित्य ठाकरेंवर हल्लाबोल

शिवसेना फूटीपासून दोन्ही गट एकमेकांवर आरोप-प्रत्यारोप करताना दिसतात. अशातच ठाकरे गटाचे नेते आणि आमदार, आदित्य ठाकरे यांनी मुख्यमंत्री शिंदे यांना आव्हान दिलं होतं. अदित्य ठाकरे यांनी एकनाथ शिंदेंना आव्हान देताना ते म्हणाले होते की, ‘आताही एकनाथ शिंदे येथे येईपर्यंत वाट पाहण्यास मी तयार आहे.

मी एकटा बसतो त्यांना ४० जणांच्या गटाबरोबर बसू दे. पण, ते पळून का गेले? खोटं का बोलले? बेरोजगारी, परदेश दौरे, भ्रष्टाचार अशा मुद्द्यांवर समोरासमोर चर्चा करू,’ असं आदित्य ठाकरे यांनी म्हटलं होतं. त्याच्या या आव्हानाला मुख्यमंत्री एकनाथ शिंदे यांचे सुपुत्र, खासदार श्रीकांत शिंदे यांनी जोरदार प्रत्युत्तर दिलं आहे.

श्रीकांत शिंदे काय म्हणालेत?

श्रीकांत शिंदे म्हणाले, "कुणीतरी आपल्या लायकीप्रमाणे बोलल्याचं समोर आलं आहे. त्यांचे विचार कुठपर्यंत जातो हे पाहिलं. कुणीतरी त्यांना बालबुद्धी म्हणून संबोधलेलं होतं. माझ्या मुलालाही जास्त समजतं. विचारांची दिवाळखोरी राज्याने पाहिलेली आहे. मुख्यमंत्री घाबरून गेले म्हणणे हास्यास्पद आहे. मुख्यमंत्री गृहमंत्रालयाकडून बोलावण्यात आलेल्या बैठकीला गेले आहेत", असंही श्रीकांत शिंदे म्हणाले आहेत.

पुढे ते श्रीकांत शिंदे म्हणाले की, "अडीच वर्षात मुख्यमंत्री आपल्याबरोबर चोवीस तास असायचे. म्हणून २४ तास मुख्यमंत्री घरीच बसतात, असं त्यांना वाटलं. पण, तू कोण आहे, तुला मुख्यमंत्री कशाला घाबरतील. मुख्यमंत्री दिवस-रात्र काम करत आहेत, राज्याने पाहिलं आहे. ऑनलाईन येऊन गरम पाणी प्या, स्वत:ची काळजी घ्या, फक्त सल्ले देणं हे मुख्यमंत्र्यांचं काम नाही. जमिनीवर उतरून लोकांचे अश्रू पुसण्याचं काम मुख्यमंत्री करत आहेत", असं श्रीकांत शिंदेंनी म्हटलं आहे.

त्याचबरोबर श्रीकांत शिंदे यांनी आदित्य ठाकरे यांच्यावर हल्लाबोल केला आहे. "तुमचं वय किती, बोलता किती. मुख्यमंत्र्यांची जेवढी कारकीर्द आहे, तेवढं तुमचं वयही नाही. बाळासाहेबांच्या आशीर्वादाने तुम्हाला सर्व फुकट मिळालं आहे. पक्ष वाढीसाठी काय करावं लागतं, तुम्हाला काय कळणार?" अशी टीका श्रीकांत शिदेंनी आदित्य ठाकरेंवर केली आहे.