MLA Disqualifications: अपात्रतेबाबत 25 सप्टेंबरला सुनावणी; ठाकरे-शिंदे आमने-सामने येणार? नार्वेकरांचे संकेत

मुंबई : शिवसेना आमदारांच्या अपात्रतेच्या सुनावणीला उशीर होत असल्यानं सुप्रीम कोर्टानं विधानसभा अध्यक्ष राहुल नार्वेकर यांना झापल्यानंतर आता सुनावणीच्या घडामोडींना वेग आला आहे. १४ सप्टेंबर रोजी सुनावणी पार पडल्यानंतर ती दोन आठवडे पुढे ढकलण्यात होती पण आता सुप्रीम कोर्टाच्या निर्देशांनुसार २५ सप्टेंबर रोजी सुनावणी घेण्यात येणार आहे.

विशेष म्हणजे या सुनावणीवेळी शिवसेनेच्या दोन्ही गटांचे प्रमुख उद्धव ठाकरे आणि एकनाथ शिंदे समोरासमोर येण्याची शक्यता आहे. स्वतः नार्वेकर यांनी याचे संकेत दिले आहेत. (Shiv Sena MLA Disqualification Hearing on September 25 Thackeray Shinde will face eachother)

दिल्ली दौऱ्यात काय झालं?

दिल्ली दौऱ्याबाबत नार्वेकर म्हणाले, "माझा हा पूर्वनियोजीत दौरा होता. त्यातल्या काही भेटीगाठी कायदेतज्ज्ञांसोबत होत्या. अपात्रतेच्या संदर्भातील कायदा हा बदलत जाणारा कायदा आहे. परिस्थितीनुसार त्यात बदल होत असतात. सुप्रीम कोर्टात झालेली याचिका आणि आदेशात कुठले बदल होणे अपेक्षित आहे किंवा त्याची अंमलबजावणी कशा योग्य पद्धतीनं व्हायला पाहिजे अशी चर्चा झाली" (Latest Marathi News)

दोन्ही पक्षांना बोलावण्यात येणार

सुप्रीम कोर्टानं एका आठवड्यात पुढील सुनावणी घेण्यासंदर्भात निर्देश दिलेले होते. तशीही आमची सुनावणी १४ तारखेला झालेली होती आणि पुढील सुनावणी प्रस्तावित होती. त्यामुळं येत्या आठवड्यात आम्ही सुनावणी घेऊन निर्णय घेऊ. गरज पडली तर दोन्ही पक्षांच्या प्रमुखांना बोलावण्यात येईल, असं नार्वेकर यांनी माध्यमांशी बोलताना सांगितलं. (Marathi Tajya Batmya)

निर्णयाला दिरंगाई करणार नाही

सध्या हा विषय न्यायप्रविष्ठ आहे तसेच मीच यावर सुनावणी घेऊन निर्णय देणार असल्यानं यावर आत्ताच अधिक बोलणं योग्य ठरणार नाही. संविधानानं न्याय व्यवस्था, कायदे मंडळ आणि कार्यकारी मंडळांना आपलं कार्यक्षेत्र आखून दिलेलं आहे. त्या कार्यक्षेत्रात राहून सर्वांनी काम करणं अपेक्षित आहे.

सुप्रीम कोर्टानं देखील याबाबत योग्य आदेश दिलेले आहेत. निर्णय करायला मी दिरंगाई करणार नाही पण कुठलीही घाई करणार नाही. कायदेशीर, संविधानिक तरतुदींचं पालन करुनच हा निर्णय घेईन. राष्ट्रवादीकडून पूर्वीच्या याचिका आल्या आहेत तेवढ्याबद्दलच मला माहिती आहे.