ShivSena: शिवसेना पक्ष, चिन्ह ठाकरेंना परत मिळणार का?, निवडणूक आयोगाच्या निर्णयाविरोधात दिवाळीनंतर सुनावणी

ShivSena: गेल्या वर्षी जूनमध्ये एकनाथ शिंदे यांनी सत्तापालट केला तेव्हा पक्षात दोन गट पडले होते. उद्धव ठाकरे आणि एकनाथ शिंदे यांच्या समर्थकांमध्ये पक्ष विभागला गेला. शिंदे गटाच्या बंडखोरीनंतर उद्धव ठाकरेंना महाराष्ट्रात मुख्यमंत्रीपदाचा राजीनामा द्यावा लागला. त्यानंतर एकनाथ शिंदे यांनी मुख्यमंत्रीपदाची तर देवेंद्र फडणवीस यांनी उपमुख्यमंत्रीपदाची शपथ घेतली.

यानंतर खरी शिवसेना ओळखण्यासाठी उद्धव गट आणि एकनाथ शिंदे गट आमनेसामने आले. जिथे बाळासाहेब ठाकरे यांची विचारधारा आम्ही पुढे नेत असल्याचे एकनाथ शिंदे गटाने सांगितले. तर उद्धव ठाकरे गट शिवसेनेवर आपला दावा सांगत होता. यानंतर शिवसेनेचे नाव आणि पक्षाचे चिन्ह धनुष्यबाण याबाबत उद्धव गट आणि शिंद गटाने निवडणूक आयोगाकडे धाव घेतली होती.

दरम्यान शिवसेना पक्ष आणि धनुष्यबाण चिन्ह शिंदे गटाला देण्याच्या निवडणूक आयोगाच्या निर्णयाविरुद्ध दाखल केलेल्या याचिकेवर आता दीवाळीनंतर सुनावणी होणार आहे. दिवाळीच्या सुट्यानंतर २० नोव्हेंबरला सुनावणी होणार आहे.

निवडणूक आयोगाने शिवसेना पक्ष आणि चिन्ह एकनाथ शिंदे यांच्या गटाला दिले आहे. या विरोधात उद्धव ठाकरे यांच्या शिवसेनेने सुप्रीम कोर्टात याचिका दाखल केली होती. या याचिकेवर ३१ ऑक्टोबर ला सुनावणी होणार होती मात्र. त्या दिवशी इलेक्ट्रोल बाँड बाबत दिवसभर सुनावणी होणार असल्यामूळे ती पुढे ढकलली होती.

या प्रकरणी अनेक महिन्यांपासून सुनावणी झाली नव्हती. आता २० तारखेला तरी सुनावणी होणार की दुसरी तारिख मिळणार हे पाहणे महत्वाचे आहे.

शिवसेना आता शिंदे गटाची आहे. निवडणूक आयोगाने शिंदे गटाला शिवसेनेचे खरे नियंत्रक केले आहे. ७८ पानी निर्णयात निवडणूक आयोगाने विधानसभेपासून संघटनेपर्यंत शिंदे गटाकडे बहुमत असल्याचे म्हटले आहे. त्यांची पुष्टी करण्यासाठी दोन्ही पक्षांनी त्यांचे दावे आणि कागदपत्रे आयोगासमोर सादर केली होती.