सोमय्यांना फाईल दाखवणे पडले महागात; तीन जणांना कारणे दाखवा नोटीस

मुंबई: किरीट सोमय्या भ्रष्टाचाराची प्रकरणे बाहेर काढण्यासाठी प्रसिद्ध आहेत. तसा त्यांचा नेहमीच दावा असतो. मात्र, आता ते पुन्हा चर्चेत आले आहेत. किरीट सोमय्या (Kirtit Somaiya) यांनी काल सोमवारी मंत्रालयात जाऊन फाईल्स बघितल्याने खळबळ उडाली आहे. त्यानंतर आता या प्रकरणाची दखल मुख्यमंत्री उद्धव ठाकरे यांनी घेतली आहे. (Uddhav Thackeray)

सोमय्या यांनी मंत्रालयात जाऊन कर्मचाऱ्याच्या खुर्चीवर बसून फाईल तपासल्याने खळबळ उडाली आहे. या प्रकरणी मुख्यमंत्र्यांनी घेतली दखल घेतली असून मुख्य सचिव यांना चौकशीचे आदेश दिले आहेत. या प्रकरणी आता तीन जणांना करणे दाखवा नोटीस पाठवण्यात आली आहे. दोन नियोजनकार आणि एक कक्ष अधिकारी अशा तीन जणांना कारणे दाखवा नोटीस दिली आहे. काल किरीट सोमय्या मंत्रालयातील नगर विकास खात्यात कक्ष १६ मध्ये आज गेले होते. तिथे ते शासकीय कर्मचाऱ्याच्या खुर्चीवर बसले आणि त्यांनी काही फाईल्स बघितल्या. कर्मचाऱ्याच्या खुर्चीवर बसून फाईल्स चेक करतानाचे किरीट सोमय्या यांचे हे मंत्रालयातील फोटो व्हायरल झाले आहेत.

किरीट सोमय्या यांच्यावर ऑफिशियल सिक्रेट अॅक्ट कायद्याचे उल्लंघन आणि सरकारी कार्यालयात घुसखोरी या कलमांखाली गुन्हा दाखल होऊ शकतो, असे सचिन सावंत यांनी म्हटले होते. मंत्रालयात जाऊन फाईल्स तपासताना मी कोणत्याही गोपनीयतेचा भंग केलेला नाही. मी केवळ घोटाळेबाज नेत्यांची माहिती घेतली, असे स्पष्टीकरण भाजप नेते किरीट सोमय्या यांनी दिले आहे. किरीट सोमय्या (Kirit Somaiya) यांनी नगरविकास खात्याच्या कार्यालयात जाऊन फाईल्स चाळल्याची छायाचित्रे नुकतीच सोशल मीडियावर व्हायरल झाली होती. त्यानंतर काँग्रेस नेते सचिन सावंत (Sachin Sawant) यांनी किरीट सोमय्या यांच्यावर गुन्हा दाखल करण्याची मागणी केली होती. या पार्श्वभूमीवर किरीट सोमय्या यांनी आपण कोणत्याही नियमाचे उल्लंघन केले नसल्याचे सांगितले. तसेच मी कोणाच्या फाईल्स पाहिल्या, याची भीती काँग्रेसला का वाटत आहे, असा सवालही किरीट सोमय्या यांनी विचारला होता.