नितेश राणेंचा मुक्काम कोठडीतच, पण...

सिंधुदुर्ग : संतोष परब हल्लाप्रकरणी भाजप आमदार नितेश राणे (Nitesh Rane) यांना न्यायालयानं पोलिस कोठडी सुनावली होती. आज त्यांची कोठडी संपली आहे. त्यामुळे त्यांना परत न्यायालयात हजर करण्यात आले आहे. पोलिसांनी नितेश यांची कोठडी वाढवून देण्याची मागणी केली आहे. पण, न्यायालयानं १८ फेब्रुवारीपर्यंत न्यायालयीन कोठडी दिली आहे. पोलिस कोठडी संपली तरी आता त्यांचा मुक्काम कोठडीत असणार आहे. आज जामिनासाठी अर्ज दाखल करण्यात येणार आहे.

सिंधुदुर्गातील शिवसेना नेते संतोष परब यांच्यावर हल्ला झाला होता. याप्रकरणी कणकवली पोलिसांनी मुख्य आरोपीला दिल्लीवरून अटक केली होती. त्यानंतर संशयाची सुई भाजप आमदार नितेश राणेंभोवती फिरत होती. त्यांना अटक करावी, अशी मागणी शिवसैनिकांनी लावून धरली होती. त्यांना चौकशीसाठी बोलावले असता ते हजर झाले नाहीत. पोलिस त्यांचा शोध घेत होते. पण, नितेश राणे कुठे होते? हे कोणाला माहिती नव्हते. शेवटी सर्वोच्च न्यायालयाने नितेश राणेंना न्यायालयाला शरण येण्यास सांगितले.

सर्वोच्च न्यायालयाच्या आदेशानुसार नितेश राणे सिंधुदुर्ग जिल्हा न्यायालयासमोर हजर झाले. त्यांनी जामिनासाठी अर्ज देखील केला. पण, राणेंनी शरण न येता अर्ज केला, असं म्हणत न्यायालयानं जामीन फेटाळून लावला. त्यांना न्यायालयीन कोठडी सुनावण्यात आली. मात्र, कणकवली पोलिसांनी संतोष परब हल्लाप्रकरणी चौकशीसाठी पोलिस कोठडीची मागणी केली. त्यानुसार न्यायालयानं नितेश राणेंना पोलिस कोठडी दिली होती. त्यानंतर त्यांना चौकशीसाठी गोव्याला नेल्याची माहिती देखील होती.

नितेश राणेंना आज न्यायालयात हजर करण्यात आलं. यावेळी दोन्ही बाजून युक्तीवाद करण्यात आला. आमची चौकशी अजून पूर्ण व्हायची आहे. त्यामुळे नितेश राणेंची पोलिस कोठडी वाढवून द्या, असा युक्तीवाद सरकारी वकिलांनी केला. आता न्यायालयानं त्यांना १८ फेब्रुवारीपर्यंत न्यायालयीन कोठडी सुनावली आहे. पण, राणेंकडून जामिनासाठी अर्ज दाखल करण्यात येणार आहे. पण, ही प्रक्रिया किती वेळ घेणार हे अद्याप स्पष्ट झाले नाही, असं राणेंच्या वकिलांकडून सागंण्यात आले आहे.