माई गेल्याने महाराष्ट्र पोरका झाला : यशोमती ठाकूर

महाराष्ट्राची माई म्हणून ओळखल्या जाणाऱ्या थोर समाजसेविका सिंधुताई सपकाळ (Sindhutai Sapkal) यांचे पुण्यात निधन झाले. त्या ७३ वर्षांच्या होत्या. माईंच्या जाण्याने अवघा महाराष्ट्र पोरका झाल्याची भावना राज्याच्या महिला आणि बालविकास मंत्री ॲड. यशोमती ठाकूर (Sindhutai Sapkal) यांनी व्यक्त केली आहे.

स्वतःला घरातून हाकलून दिल्यानंतर आत्महत्या करण्यासाठी बाहेर पडलेली सिंधुताई यांनी परिस्थितीवर मात करत आपल्यासारख्या पिचलेल्या महिलांची आणि अनेक अनाथ बालकांची आई झाली. माईच्या आश्रमात दीड हजारांहून अधिक मुलांनी मोकळ्या आभाळाखाली जगण्याचे शिक्षण घेतले. आश्रमातील अनेक बालकांच्या पंखात बळ भरत माईने त्यांना समाजात मानाचे स्थान प्राप्त करून दिले, असे यशोमती ठाकूर म्हणाल्या.

अनेक शासकीय उच्चपदस्थ अधिकाऱ्यांपासून उद्योगपतींपर्यंत मायेच्या पंखाखाली मुलांनी भरारी घेतली. सिंधुताईंच्या या अतुलनीय कामगिरीची दखल घेत त्यांना राष्ट्रीय आंतरराष्ट्रीय ९०० हून अधिक पुरस्कार प्राप्त झाले आहेत. मानाचा पद्मश्री पुरस्कार केंद्र सरकारने देऊन त्यांना नुकतेच गौरवलं होते. माईंच्या जाण्यामुळे अवघा महाराष्ट्र पोरका झाल्याची भावना व्यक्त करून माईंच्या मोठ्या परिवाराच्या दुःखात सहभागी असल्याची भावना व्यक्त करीत यशोमती ठाकूर यांनी श्रद्धांजली वाहिली आहे.