Soyabean And Cotton Crop Damage: पावसाने हाहाकार! शेतकऱ्यांच्या हातातोंडाशी आलेला घास हिरावला; सोयाबीन, कापूस पाण्यात

परळी वैजनाथ: गेल्या दोन दिवसांपासून पावसाने पुन्हा थैमान घातले असून पावसामुळे हाहाकार माजला असून शेतकऱ्यांच्या हातातोंडाशी आलेला घास हिरावला. तर सोयाबीनच्या शेंगांची गळती होऊन वेचणीस आलेल्या कापसाच्या वाती झाल्या आहेत.

यामुळे शेतकऱ्यांचे मोठे आर्थिक नुकसान झाले आहे. मायबाप सरकारने याकडे लक्ष देण्याची मागणी शेतकऱ्यांनी केली आहे.

पावसामुळे नद्या, नाल्या, ओढे खळाळले असून नदीला आलेल्या पुरामुळे, बीड-परळी व परळी गंगाखेड राष्ट्रीय महामार्गावरील वाहतूक पुन्हा ठप्प झाली आहे.

परळी बीड रस्त्यावरील वाफ नदीला आलेल्या पुरामुळे तात्पुरता पर्यायी पूल दुसऱ्यांदा वाहून गेला. तर परळी- गंगाखेड मार्गावरील पुलाच्या अर्धवट कामामुळे पुन्हा तिसऱ्यांदा वाहतूक ठप्प झाली आहे.

दरम्यान, सध्या सोयाबीन, कापूस शेतकऱ्यांच्या शेतात उभे असून सोयाबीन काढणीसाठी आले आहे. जोरदार पडलेल्या पावसामुळे सोयाबीनच्या शेंगांना गळती लागली तर वेचणीसाठी आलेला कापसाच्या पावसामुळे वाती झाल्या आहेत.

शेतकऱ्यांच्या नशीबी कधी कोरडा तर कधी ओला दुष्काळ

१५ दिवसांपूर्वी अतिवृष्टी झाली होती. त्याचेच पंचनामे पूर्ण झाले नाहीत तर आता पुन्हा शेतकऱ्यांचे मोठे आर्थिक नुकसान झाले आहे. पहिलीच नुकसान भरपाई मिळाली नाही आता दुसऱ्यांदा पडलेल्या पावसाने शेतकरी हवालदिल झाला आहे. पहिलेच पंचनामे अर्धवट असताना या नुकसानीचे पंचनामे कधी करणार? असा प्रश्न शेतकऱ्यांना पडला आहे.

शेतकऱ्यांच्या नशीबी कधी कोरडा दुष्काळ तर कधी ओला दुष्काळ. यामुळे शेतकरी पुरता मेटाकुटीला आला आहे. मागच्या वर्षीचा भावातील फरक म्हणून पाच हजार रुपये शासनाने फरक देण्याचे घोषित केली आहे ते मिळाले नाहीत, अतिवृष्टीची नुकसान भरपाई मिळाली नाही. आता हातातोंडाशी आलेला घास हिरावल्याने शेतकरी वर्ग अडचणीत सापडला आहे. याकडे सरकारने लक्ष देवून लवकरात लवकर नुकसान भरपाई देण्याची मागणी शेतकऱ्यांनी केली आहे.