वरळी सोडून डोंबिवलीतून निवडणूक लढवून दाखवा; श्रीकांत शिंदेंचं आदित्य ठाकरेंना थेट आव्हान

मुंबई - शिवसेनेत फूट पडल्यानंतर शिंदे गट आणि ठाकरे गटात सातत्याने एकमेकांवर आरोप करण्यात येत आहेत. आदित्य ठाकरे सातत्याने मुख्यमंत्री एकनाथ शिंदे यांच्यावर हल्लाबोल करताना दिसतात. मुख्यमंत्री शिंदे घाबरून गेले, असा दावा आदित्य यांनी केला होता. त्याला मुख्यमंत्र्यांचे पुत्र खासदार श्रीकांत शिंदे यांनी प्रत्युत्तर दिले आहे.

श्रीकांत शिंदे म्हणाले की, काही लोकं लायकी सोडून बोलले. त्यांना बालबुद्धी म्हटलं जातं, हे संपूर्ण महाराष्ट्रानं पाहिलं आहे. मुख्यमंत्री हे घाबरून गेले, असा दावा करणं अत्यंत हास्यास्पद आहे. मुख्यमंत्री हे दिल्लीत नक्षलवादी गतविधीच्या बैठकीला गेलेत, असंही श्रीकांत शिंदे यांनी आदित्य ठाकरे यांना उद्देशून म्हटलं.

पहिले मुख्यमंत्री २४ तास घरी असायचे. त्यांना कोण घाबरणार. सध्याचे मुख्यमंत्री दीड वर्षापासून दिवसरात्र काम करत आहेत. तर आधीचे मुख्यमंत्री ऑनलाईन येऊन गरम पाणी प्यायला लावायचे. मात्र आमचे मुख्यमंत्री ग्राऊंडवर जावून काम करायचे. तब्येत ठीक नसताना मुख्यमंत्री दोन तास डोंगर चढून इर्शाळवाडीत आढावा घेण्यासाठी गेले होते, असंही श्रीकांत शिंदे यांनी सांगितलं.

दरम्यान आदित्य ठाकरे यांनी एकनाथ शिंदेंना वरळीतून निवडणूक लढवून दाखवण्याचं आव्हान दिलं होतं. त्याला प्रत्युत्तर देताना श्रीकांत शिंदे यांनी आदित्य ठाकरेंनाच डोंबिवलीतून निवडणूक लढवण्याचं आव्हान दिलं आहे.