स्पर्धा परीक्षेची तयारी करणाऱ्या विद्यार्थ्यांनी मांडल्या राज्यपालांसमोर व्यथा!

करमाळा (सोलापूर) : राज्यातील स्पर्धा परीक्षा (Competitive exams) देणाऱ्या विद्यार्थ्यांची व्यथा करमाळा (Karmala) तालुक्‍यातील मिरगव्हाण (Mirgavhan) येथील महेश घरबुडे (Mahesh Gharbude) व नगर (Nagar) जिल्ह्यातील अकोले (Akole) तालुक्‍यातील इंदोरी (Indori) येथील शर्मिला येवले (Sharmila Yewale) यांनी राज्यपाल भगतसिंह कोश्‍यारी (Governor Bhagatsingh Koshyari) यांच्यासमोर मांडल्या. यापूर्वी त्यांनी पुण्यात आंदोलन (Agitation) केले होते. राज्यपालांची भेट घेऊन त्यांनी विविध मागण्या केल्या आहेत.

राज्यपालांना भेटून दिलेल्या निवेदनात म्हटले, की राज्यात कोरोनाचे रुग्ण सापडायला सुरवात झाल्यापासून बेरोजगारांची संख्या वाढत आहे. दोन वर्षांत सरकारी नोकर भरतीवर अप्रत्यक्ष बंदीच सरकारने आणली आहे. त्यामुळे स्वप्नील लोणकर व इतर होतकरू तरुणांनी आत्महत्या केल्या आहेत. राज्यात स्पर्धा परीक्षा करणारे तरुण खूप नैराश्‍यात आहेत. सरकारकडून उपाययोजना केल्या गेलेल्या नाहीत. एमपीएससीच्या गट- क, कृषी सेवा व वन सेवा या 2020 च्या जाहिराती 2021 संपायला आले तरीही आलेल्या नाहीत. ही पदभरती तत्काळ जाहीर करावी.

फेब्रुवारी 2021 मध्ये झालेली आरोग्य भरती व इतर सरळसेवा परीक्षांमध्ये खासगी कंपन्यांद्वारा होत असलेला गैरव्यवहार थांबविण्यासाठी गट- क आणि गट- ड पदांच्या सर्व परीक्षा एमपीएससीद्वारे घेण्यात याव्यात, दोन वर्षांत कोरोनाचे थैमान असताना स्पर्धा परीक्षा होऊ शकलेल्या नाहीत आणि नवीन जाहिरातीही आलेल्या नाहीत. त्यामुळे कित्येक विद्यार्थी वय संपल्यामुळे एजबार झालेले आहेत. म्हणून सरसकट सगळ्या परीक्षांच्या वयोमर्यादेत दोन वर्षांची सूट जाहीर करावी, एमपीएससीचे वेळापत्रक एमपीएससीप्रमाणे एक वर्षाआधी जाहीर करण्यात यावे, एमपीएससीचे काही सदस्य येणाऱ्या काळात निवृत्त होत आहेत, त्यांची निवड प्रक्रिया आताच सुरू करावी, एमपीएससीवर कार्याचा भार बघता एमपीएससीची एकूण सदस्य संख्या 15 ते 20 पर्यंत वाढविण्यात यावी अशा मागण्या त्यांनी राज्यपालांसमोर मांडल्या.