'हिंदुस्थानी भाऊला अटक करुन तुमची यातून सुटका होणार नाही'

दहावी आणि बारावीच्या (10th and 12th Board exams) ऑफलाइन परीक्षांना (Offline Exams) विद्यार्थ्यांकडून विरोध होताना दिसतोय. मुंबई, पुणे (Pune), नागपूर (Nagpur) आणि अकोल्यासह काही ठिकाणी विद्यार्थ्यांनी आंदोलन केलंय. त्यामुळं आता पुन्हा एकदा राज्य सरकारसमोर आव्हान निर्माण होणार असल्याची शक्यता आहे. यावरती भाष्य करताना भाजप नेते आशिष शेलार (Ashish Shelar) यांनी ठाकरे सरकारवर (Thackeray Government) जोरदार निशाणा साधलाय.

भाजप नेते शेलारांनी ट्विटमध्ये लिहिलंय की, 11 हजार कोटींच्या प्रीमियमची खैरात बिल्डरांवर करणाऱ्या ठाकरे सरकारनं विद्यार्थ्यांची फी माफ करायला हरकत नाही. शिवाय, परीक्षांबाबतचा असंतोष विद्यार्थी रस्त्यावर येऊन सांगत आहेत, त्यांचं म्हणणं ऐकून घ्यायला हरकत नाही. तसेच हिंदुस्थानी भाऊला (Hindustani Bhau अटक करुन तुमची यातून 'सुटका' होणार नसल्याचंही स्पष्ट मत शेलारांनी व्यक्त केलंय.

ऑफलाइन परीक्षा रद्द करावी, अशी मागणी विद्यार्थी रस्त्यावर उतरुन करत आहेत. वर्षभर ऑनलाइन शिकवलं, तर मग परीक्षाही ऑनलाइनच घ्या. तुम्ही वर्षभर ऑनलाइन शिकवता आणि ऑफलाइन परीक्षा घेता, हे योग्य नाही. त्यामुळं परीक्षा रद्द करा, अशी मागणी विद्यार्थ्यांनी रेटून धरलीय. त्यामुळं राज्य सरकारसमोर मोठं आव्हान निर्माण झालंय. यावरती लवकरात-लवकर तोडगा काढला जाईल, अशी माहिती शिक्षण विभागाकडून देण्यात येत आहे.