'पवारांविषयीची केतकी चितळेची फेसबुक पोस्ट घाणेरडी अन् चुकीची'

अभिनेत्री केतकी चितळे हिने राष्ट्रवादी काँग्रेसचे ज्येष्ठ नेते शरद पवार यांच्यावर केलेल्या टीकेमुळे सध्या राज्यात गदारोळ निर्माण झाला आहे. यावरुन वाद सुरु असून या वादाच्या पार्श्वभूमीवर आता वंचित बहुजन आघाडीचे नेते सुजात आंबेडकर (Sujat Ambedkar) यांनी प्रतिक्रिया दिली आहे. शरद पवार (Sharad Pawar) यांच्याविषयी लिहण्यात आलेली फेसबुक पोस्ट घाणेरडी आणि चुकीची होती, असे त्यांनी म्हटलं आहे.

इतक्या मोठ्या आणि ज्येष्ठ नेत्याबद्दल इतक्या खालच्या दर्जाची भाषा वापरणे अयोग्य असल्याचेही सुजात आंबेडकर म्हणाले आहेत. महाराष्ट्राच्या राजकारणात शरद पवार यांना आदराचं स्थान असून जगभरातील कॅन्सरच्या रुग्णांसाठी पवार हे एक प्रेरणा आहेत. कॅन्सरवर मात करून ते या वयातही इतकं बोलतात, लोकांना भेटतात, भाषणं करतात. त्यामुळे केतकीने लिहलेली ती पोस्ट घाणेरडी असल्याचं ते म्हणाले आहेत.

अशाप्रकारच्या ट्रोलिंगमुळे नेत्यांचं मानसिक आरोग्य बिघडू शकते. केतकी चितळेचे वक्तव्य अतिशय घाणेरडं आणि चुकीचं आहे. अभिव्यक्ती स्वातंत्र्याचा वापर करायचा असेल तर धोरणांवर, भूमिकांवर आणि राजकारणावर टीका करा. पण कुणाच्या अंगावर, दिसण्यावर नाही, असे सुजात आंबेडकर यांनी म्हटले.

दरम्यान, केतकी चितळे हिच्या फेसबुक पोस्टनंतर राज्यभरातील राष्ट्रवादी काँग्रेसच्या कार्यकर्त्यांकडून संताप व्यक्त केला जात आहे. केतकी चितळे हिच्यावर कठोर कारवाई व्हावी, अशी मागणी केली जात आहे. ठाणे सत्र न्यायालयाने रविवारी झालेल्या सुनावणीवेळी केतकी चितळे हिला ३ दिवसांची पोलिस कोठडी सुनावली होती. १८ मे रोजी तिला पुन्हा न्यायालयात हजर केले जाईल. तोपर्यंत ठाणे गुन्हे अन्वेषण शाखेकडून केतकी चितळे हिची चौकशी होईल.