सबस्क्राईब करा
नवी दिल्ली- उपमुख्यमंत्री अजित पवार यांच्या पत्नी सुनेत्रा पवार बारामती लोकसभा मतदारसंघातून निवडणूक लढवतील अशा जोरदार चर्चा सुरु आहेत. कारणही तसंच आहे. सुनेत्रा पवार यांच्या वाढदिवशी बारामती मतदारसंघात त्यांचे मोठ-मोठे होर्डिंग लावण्यात आले होते. यावर त्यांचा खासदार म्हणून उल्लेख करण्यात आला होता. त्यामुळे सुनेत्रा पवार बारामतीमधून निवडणूक लढवणार का असा प्रश्न पडत आहे.
सुनेत्रा पवार बारामतीमधून निवडणूक लढवतील का? असा प्रश्न अजित पवार यांना विचारण्यात आला होता. यावर त्यांनी प्रतिक्रिया दिली आहे. आम्ही विचार करु. वेळ येईल त्यावेळी त्या त्या गोष्टींचा विचार केला जाईल, असं अजित पवार म्हणाले आहेत. त्यांच्या या वक्तव्यामुळे भविष्यात काहीही होऊ शकतं, अशा प्रकारचे संकेत त्यांनी दिले आहेत.
वाढदिवसानिमित्त वारजे पुलावर सुनेत्रा पवार यांचे होर्डिंग लागले होते. त्यांच्या फोटोसोबत संसदेचे चित्र देखील दाखवण्यात आलं होतं. त्यामुळे सुनेत्रा पवार बारामती लोकसभा लढवतील अशी राजकीय वर्तुळात चर्चा सुरु झाली. सध्या बारामती लोकसभा मतदारसंघातून राष्ट्रवादी काँग्रेसच्या नेत्या सुप्रिया सुळे या खासदार आहेत. त्यामुळे सुनेत्रा पवार निवडणुकीसाठी उभ्या राहिल्यास सुप्रिया सुळे विरुद्ध सुनेत्रा पवार अशी लढत पाहायला मिळू शकते.
सुप्रिया सुळे यांनाही याबाबत प्रश्न विचारण्यात आला होता. यावेळी त्या म्हणाल्या होत्या की, 'माझ्याविरोधात कोणीही निवडणूक लढवू शकतं.' दोन्ही गटाकडून सावध प्रतिक्रिया येत असल्याने सुप्रिया सुळे विरुद्ध सुनेत्रा पवार अशा लढतीची शक्यता नाकारता येत नाही. त्यामुळे लोकसभा निवडणुकीच्यावेळी काय चित्र निर्माण होतं हे पाहावं लागेल.
राष्ट्रवादी काँग्रेसमध्ये दोन गट पडले आहेत. अजित पवारांनी अनेक आमदार आणि खासदार आपल्यासोबत असल्याचा दावा केला आहे. यावरुन विधानसभा अध्यक्ष यांच्यासमोर आमदार अपात्रता प्रकरणी सुनावणी सुरु आहे. (Latest Marathi News)
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.
