Supriya Sule : केसरकरांच्या ‘त्या’ वक्तव्यावर सुप्रिया सुळे म्हणतात, अजित पवार राजकारणातील ‘अमिताभ बच्चन'!

मुंबई : राजकारणात ज्या नेत्याचा दबदबा असतो त्याच नेत्यावर विरोधक टीका करतात, असा दावा करत राष्ट्रवादीचे नेते अजित पवार हे महाराष्ट्राच्या राजकारणातील अमिताभ बच्चन आहेत, असा टोला राष्ट्रवादीच्या राष्ट्रीय कार्याध्यक्षा सुप्रिया सुळे यांनी विरोधकांना लगावला.

सिनेसृष्टीत अमिताभ बच्चन सर्वांनाच आपापल्या चित्रपटात हवे असतात. सर्वांनाच अमिताभ बच्चन यांचा आवाज चालतो, त्यांचा फोटो, लुकदेखील चालतो. एवढंच काय पण त्यांची सही ऑटोग्राफ म्हणूनही चालते. त्यामुळेच अजित पवार महाराष्ट्राच्या राजकारण सर्वांनाच आपापल्याकडे हवे असतात. त्यामुळेच, अजित पवार राज्याच्या राजकारणातील अमिताभ बच्चन आहेत, असा टोला सुप्रिया सुळे यांनी मंत्री दीपक केसरकर यांच्या वक्तव्यावर लगावला.

राष्ट्रवादीच्या राष्ट्रीय कार्याध्यक्षपदाची जबाबदारी घेतल्यानंतर आज सुप्रिया सुळे प्रथमच पक्षाच्या मुख्यालयात आल्या होत्या. यावेळी ढोलताशांच्या गजरात त्यांचे स्वागत करण्यात आले. यावेळी बोलताना सुळे म्हणाल्या की, पक्षाने कार्याध्यक्षपदाची जबाबदारी सोपविली आहे. पण, आपण सगळेच एक परिवार म्हणून एकत्र आहोत.

एखाद्या घरात लग्न असले की कोणी एकटाच धावपळ करत नाही, प्रत्येकाला जबाबदारी दिलेली असते. त्यामुळे पक्ष म्हणून, एक कुटुंब म्हणून आम्ही काम करतो आहोत. हे काम करत असताना प्रत्येकाला वेगवेगळ्या जबाबदाऱ्या वाटण्यात आल्या आहेत.

लोकसभेच्या तयारीला राष्ट्रवादी काँग्रेसने अगोदर तपासूनच सुरुवात केली आहे. त्याबाबत अनेक बैठकाही सुरू आहेत. महाविकास आघाडीच्या जागावाटपात सर्वानुमते निर्णय होईल. असेही त्यांनी सांगितले.

केंद्र, राज्य सरकार महिलांबद्दल असंवेदनशील

दरम्यान, महिलांवरील वाढत्या अत्याचाराच्या घटनांबाबत खंत व्यक्त करताना सुप्रिया सुळे म्हणाल्या की, केंद्र व राज्य सरकार महिलांच्याबाबतीत अतिशय असंवेदनशील आहे. दिल्लीत महिला कुस्तीपटूंचे प्रकरण ज्यापद्धतीने पोलिसांनी हाताळले त्याबाबत खंत तर आहेच, पण महाराष्ट्रात सातत्याने महिलांच्या विरोधातील अत्याचाराच्या घटनांमुळे वेदना होतात. या सर्व घटनांना सर्वस्वी राज्याचे गृहखाते जबाबदार असल्याचा आरोप सुळे यांनी यावेळी केला.