Budget Session : 'त्या' दुर्घटनेतील दोषींवर कारवाई करा; सभागृहात अंबादास दानवेंनी वेधलं लक्ष

Maharashtra Assembly Budget Session : राज्यविधीमंडळाचं अर्थसंकल्पीय अधिवेशन सुरु आहे. शिंदे-फडणवीस सरकार (Shinde-Fadnavis Government) स्थापन झाल्यानंतरचं हे त्यांचं पहिलंच अधिवेशन आहे.

अधिवेशनाच्या पहिल्या दिवसांपासून सभागृहात गदारोळ सुरु आहे. सत्ताधारी आणि विरोधीपक्षात आरोप-प्रत्यारोप सुरुच आहेत. आता जिंदाल पॉलिफिल्म प्रा. लि. कंपनीतील (Jindal Polyfilm Company) दुर्घटनेप्रकरणी विरोधकांनी आक्रमक भूमिका घेत आज सभागृहाचं लक्ष वेधलं.

या कंपनीतील दुर्घटनास्थळी भेट देऊन पाहणी केली. त्यावेळी तेथील अग्निशमन यंत्रणा ही या घटनेच्या आधीपासूनच बंद होती. प्लँटमधून थर्मिक फ्लूईड ऑईलची गळती होऊन अनेक कामगार जखमी झाले, अशी माहिती विधान परिषदेतील विरोधी पक्षनेते अंबादास दानवे (Ambadas Danve) यांनी सभागृहात दिली.

अशा घटना टाळण्यासाठी व घटना घडल्यावर कारवाई व्हावी, यासाठी जो विभाग काम करतो, तो म्हणजे औद्योगिक सुरक्षा व कामगार विभागांतर्गत येणारा डिश विभाग. मात्र, हा विभागच अकार्यक्षम असल्याचा मुद्दा दानवेंनी सभागृहाच्या निदर्शनास आणून दिला. या घटनेला कंपनी जबाबदार असतानाही पोलिसांना (Police) कारवाई करता येत नाही, असंही दानवे म्हणाले.

सरकारी अधिकाऱ्यांना दुर्घटना झाल्यावर प्रवेश नाकारला जातो, अशाप्रकारे कंपन्यांची दादागिरी बंद झाली पाहिजे. या प्रकरणात 3 जणांचा मृत्यू, तर 20 जण जखमी झाले आहेत. त्यामुळं या दुर्घटनेला जबाबदार असणाऱ्या कंपनीवर सरकार काय कारवाई करणार? असा सवालही दानवेंनी उपस्थित केला.