Latur News : ‘नीट’ गैरव्यवहारप्रकरणी शिक्षकाला कोठडी

लातूर : वैद्यकीय प्रवेश पात्रता परीक्षा (नीट) पेपरफुटीप्रकरणातील संशयित संजय जाधव यास केंद्रीय अन्वेषण विभागाने (सीबीआय) सोमवारी (ता. आठ) न्यायालयासमोर हजर केले. न्यायालयाने त्याला न्यायालयीन कोठडीत ठेवण्याचे आदेश दिले आहेत.

नीट परीक्षा पेपरफुटीप्रकरणात येथे गुन्हा नोंद झाल्यानंतर संजय जाधव व जलील पठाण या शिक्षकांना अटक करण्यात आली होती.

पहिल्यांदा दहशतवादी विरोधी पथक, त्यानंतर स्थानिक पोलिसांनी या प्रकरणात तपास केला. त्यानंतर हे प्रकरण ‘सीबीआय’कडे गेले. गेल्या आठ दिवसांपासून या प्रकरणाचा तपास ‘सीबीआय’ करीत आहे. यात शनिवारी (ता. सहा) ‘सीबीआय’ने दोघांनाही न्यायालयात हजर केले होते. त्यावेळी संजय जाधव याची कोठडी न्यायालयाने दोन दिवस वाढवून दिली होती. जलील पठाण याला मात्र न्यायालयीन कोठडीत ठेवण्य़ाचे आदेश दिले होते.