स्मशानभूमीत दफन केलेला मृतदेह तिसऱ्या दिवशी गायब! सोलापूर पोलिसांनी श्वान पथक बोलावले, पण ते जागेवरच घुटमळले; जनावराने उकरले असल्याचा पोलिसांना संशय

सोलापूर : मोदी स्मशानभूमीत दफन केलेल्या सहा महिन्याच्या बाळाचा मृतदेह तिसऱ्या दिवशी जागेवर नसल्याची तक्रार नातेवाईकांनी केली. नातेवाईकांचा कोणावरही संशय नाही, पण स्मशानभूमीत सुरक्षारक्षक, सीसीटीव्ही असावे अशी त्यांची मागणी आहे. सदर बझार पोलिस या घटनेचा तपास करीत आहेत.

बाळाच्या डोक्याला मार लागल्याने १४ जून रोजी सोलापुरातील एका खासगी हॉस्पिटलमध्ये बाळाचा मृत्यू झाला होता. त्याच दिवशी दुपारच्या सुमारास बाळाचा मृतदेह मोदी स्मशानभूमीत दफन केला होता. त्यावेळी खड्डा खोदून त्यात मृतदेह पुरून वरील बाजूला फरशी, काटेरी फांद्या ठेवल्या होत्या. त्यानंतर तिसऱ्या दिवशी दफन केलेल्या बाळाला दूध ठेवण्यासाठी नातेवाईक मोदी स्मशानभूमीत आल्यानंतर त्याठिकाणचा खड्डा उकरलेला दिसला.

अर्धवट उकरलेल्या खड्ड्यात बाळाचा मृतदेह नव्हता, पण त्याच्या अंगावरील कपडे जवळच पडले होते. त्यानंतर याबद्दल माहिती मिळताच तातडीने सदर बझार पोलिस ठाण्याचे अधिकारी मोदी स्मशानभूमीत दाखल झाले. त्यावेळी श्वान पथक देखील तेथे आणले होते. बाळाचे कपडे श्वान पथकासमोर ठेवले, पण श्वान पथक जागेवरच घुटमळले. दरम्यान, पोलिसांच्या प्राथमिक माहितीनुसार खड्डा उकरण्याची पद्धत जनावरांसारखी असून जनावरानेच हा प्रकार केला असावा, असा पोलिसांचा अंदाज आहे. तरीपण, पोलिस उपनिरीक्षक सागर काटे तपास करीत आहेत.

अधिक तपास सुरू आहे

मोदी स्मशानभूमीत भेट देऊन घटनास्थळाची पाहणी केली. त्या बाळाचा मृतदेह दफन केलेल्या खड्ड्यात नसल्याची त्याच्या कुटुंबीयांचे म्हणणे आहे. खड्डा उकरण्याची पद्धत जनावरांचीच असून आम्ही अधिक तपास करीत आहोत.

- सचिन काटे, पोलिस उपनिरीक्षक, सदर बझार पोलिस ठाणे

कुटुंबीयांचे गंभीर आरोप

मोदी स्मशानभूमीत कोणताही सुरक्षारक्षक नाही. याठिकाणी सीसीटीव्ही देखील नाहीत. शहरातील अनेक मद्यपी स्मशानभूमीत मद्यपान करीत बसतात, आता पण दारूच्या बाटल्या दिसतात, असा आरोप मृत बाळाच्या कुटुंबीयांनी केला आहे. त्यावर त्यांनी महापालिकेकडून सुधारणांची अपेक्षा व्यक्त केली आहे.