सरन्यायाधीशांनी सिनियरचा मानला सल्ला! ३९ वर्षांत ना कधी पैसे मागितले ना फी सांगितली

सोलापूर : ३९ वर्षांपूर्वी वकिली व्यवसायात पदार्पण करतेवेळी ‘पैशाच्या मागे कधी धावू नकोस, सरस्वतीची पूजा करत राहा, लक्ष्मी सदैव तुझ्या मागे येईल’, असा सल्ला माझ्या सिनियरने दिला. त्यानुसार वाटचाल केली आणि ‘मी कधीच ना पैसे मागितले ना फी सांगितली’. आज मला अपेक्षेपेक्षा जास्त पैसा, किर्ती, नाव, समाधान मिळाले, असे सरन्यायाधीश उदय लळित यांनी स्पष्ट केले.

महाराष्ट्र-गोवा बार कौन्सिल व सोलापूर बार असोसिएशनतर्फे सोलापुरात आयोजित राज्यस्तरीय वकिल परिषदेच्या उद्‌घाटनानिमित्त सरन्यायाधीश उदय लळित आज सोलापुरात आले होते. यावेळी त्यांनी आपल्या जीवनाची वाटचाल कथन करीत नवोदित वकिलांना व तरूणांना मार्गदर्शन केले. याप्रसंगी मुंबई उच्च न्यायालयाचे मुख्य न्यायमूर्ती दिपांकुर दत्ता, उच्च न्यायालयाचे न्यायमूर्ती एम. एस. कर्णिक, एन. जे. जमादार, विनय जोशी, राज्याचे महाधिवक्ता आशितोष कुंभकोणी, विशेष सरकारी वकिल उज्वल निकम, बार कौन्सिल ऑफ इंडियाचे अध्यक्ष मननकुमार मिश्रा, सदस्य जयंत जायभावे, महाराष्ट्र-गोवा बार कौन्सिलचे अध्यक्ष मिलिंद थोबडे, सोलापूर बार असोसिएशनचे अध्यक्ष निलेश ठोकडे, माजी केंद्रीय गृहमंत्री सुशिलकुमार शिंदे, प्रमुख जिल्हा न्यायाधीश डॉ. शब्बीर औटी, जिल्हा सरकारी वकिल प्रदिपसिंग राजपूत आदी उपस्थित होते. यावेळी राज्याचे महाधिवक्ता कुंभकोणी म्हणाले, सोलापूरचा माणूस न्यायव्यवस्थेच्या मुख्य स्थानावर पोहोचल्याचा अभिमान आहे. विनम्र स्वभाव, संयमी वृत्ती, कोणालाही अपशब्द न बोलणारे, चौकटीबाहेर विचार करणारे त्यांचे गुण नवोदित वकिलांनी घ्यावेत. पैशासाठी वकिली न करता सर्वसामान्यांना न्याय देण्याचे काम करा.

फाईल म्हणजेच ‘लाईफ’

कोणत्याही प्रकरणाची फाईल वकिलांमार्फत न्यायाधीशांपर्यंत येतात. वकिलांसाठी ती फाईल असते, पण न्यायदान करणाऱ्या न्यायाधीशांसाठी ती लाईफ असते. वकिलांचे विशेषत: तरुणांचे भाषेवर प्रभुत्व असायला हवे. इंटरनेट हे माहितीचे साधन आहे, पण ज्ञानासाठी जर्नलस, पुस्तके, न्यायनिवाडे ही साधने आहेत. परिपूर्ण ज्ञानातून सर्वकाही मिळू शकते, असा विश्वास मुंबई उच्च न्यायालयाचे मुख्य न्यायमुर्ती दिपांकुर दत्ता यांनी व्यक्त केला.

व्यवसायात अडचणी आल्या, तरी खचू नका

व्यवसाय करताना अनेकदा प्रचंड त्रास होतो, ताण असतो, पण पॅशनमधून स्वत:वर आत्मविश्वास ठेवून वाटचाल केल्यास हे प्रोफेशन तुम्हाला सर्वकाही देईल, असेही त्यांनी यावेळी सांगितले. प्रत्येक व्यवसायात अनंत अडचणी येतात, त्रास होतो, अपयश येते. आपल्या देशात ३० वर्षांखालील तरूणांची संख्या एकूण लोकसंख्येच्या निम्मी आहे. जर्मनी, रशियासह इतर देशांमध्ये खूप सिनियर लोक आहेत. आपल्या तरूणांना धेयासक्ती हवी. देशाची घौडदौड तरूणांच्या हाती असून त्यांच्यासाठी ज्ञान, व्यवसायाच्या कक्षा खूप रुंदावल्या आहेत. पण, सचोटी, आत्मविश्वासाने पॅशन म्हणून काम केल्यास निश्चितपणे सर्वकाही सुरळीत होईल, असा विश्वास सर्वोच्च न्यायालयाचे सरन्यायाधीश उदय लळित यांनी व्यक्त केला.