Maharashtra Politics : आमदारांनी विधीमंडळात चक्क पोलिस अधिकाऱ्याची धुलाई केली होती..

आज राज्याच्या पावसाळी अधिवेशनाचा पाचवा दिवस आहे. विधान भवनात आजचा दिवस वादळी ठरला आहे. मागील चार दिवसांपासून विरोधक सत्ताधाऱ्यांविरोधात विधानभवनाच्या पायऱ्यांवर आंदोलन करताना दिसत आहेत. दरम्यान, आज या आंदोलनाला गालबोट लागले असून विरोधक आणि सत्ताधाऱ्यांमध्ये धक्काबुक्की झाली आहे.

आज सत्ताधाऱ्यांनी उद्धव ठाकरेंविरोधात आंदोलन केले. तिथेच विरोधकही आंदोलन करताना दिसले. दोन्ही गटात बाचाबाची झाली असल्याचे पाहायला मिळालं आहे. दरम्यान, अजित पवार यांनी समजुतीचा मार्ग काढत त्यांनी सुरू असलेला वाद थांबवला. मात्र या वादात अमोर मिटकरी यांनी महेश शिंदे यांची कॉलर पकडली असल्याचे दिसले. याआधीही आमदारांनी विधीमंडळात एका पोलिस अधिकाऱ्याला मारहाण केली होती.

९ वर्षांपूर्वी म्हणजेच २०१३ मध्ये विधिमंडळात पीएसआयला मारहाण केल्याची घटना घडली होती. याप्रकरणी आमदार क्षितिज ठाकूर आणि राम कदम यांना पोलिसांनी अटक करून कोर्टात सादर केले होते. त्यांना याप्रकरणी एका दिवसाची पोलिस कोठडीही सुनावण्यात आली होती. दोघांनाही क्रॉफर्ड मार्केट येथील कोठडीमध्ये ठेवण्यात आले होते.

यावेळी सीसीटीव्ही फुटेजमध्ये आमदार प्रदीप जैस्वाल, जयकुमार रावल आणि राजन साळवी दिसत नसल्याचा दावा भाजपने केला होता. त्यांचे निलंबन कोणत्या आधारे केले, असा प्रश्नही विरोधी पक्षाने उपस्थित केला होता. दरम्यान, पोलिस अधिकाऱ्यास केलेल्या मारहाण प्रकरणातील निलंबित आमदार क्षितीज ठाकूर आणि राम कदम यांना १४ दिवसांची न्यायालयीन कोठडी सुनावण्यात आली होती.

दरम्यान, २०१३ ला विधान भवनात पोलिस उपनिरीक्षक सचिन सूर्यवंशी यांना ठाकूर आणि कदम यांच्यासह १५ आमदारांनी मारहाण केली होती. सूर्यवंशी यांनी दिलेल्या तक्रारीत ठाकूर आणि कदम यांना ओळखले होते. त्यावरून या दोघांना अटक करण्यात आली. या दोघांचे जबाब नोंदविल्यानंतर त्यांना गुन्हे शाखा १ ने अटक केली होती. आमदार क्षितीज ठाकूर आणि राम कदम यांच्या जामीनासाठी कोर्टात निर्णयही झाला होता.