बोर्डाच्या परीक्षेत विद्यार्थ्यांना २ पेपरमध्ये अभ्यासासाठी वेळ; दहावी-बारावीचे प्रात्यक्षिक फेब्रुवारीच्या पहिल्या आठवड्यात, कोणत्या विषयाचा पेपर कधी? वाचा...

सोलापूर : इयत्ता दहावी व बारावीच्या बोर्ड परीक्षांचे वेळापत्रक जाहीर झाले असून महाराष्ट्र राज्य माध्यमिक व उच्च माध्यमिक शिक्षण मंडळाने दोन विषयांच्या पेपरमध्ये एक ते तीन दिवसांचे अंतर ठेवले आहे. जेणेकरून विद्यार्थ्यांना अभ्यासासाठी वेळ मिळावा, त्यांच्यावर जास्त ताण येणार नाही हा त्यामागील हेतू आहे. बारावीच्या विद्यार्थ्यांची परीक्षा ११ फेब्रुवारी तर दहावीची परीक्षा २१ फेब्रुवारी सुरू होणार आहे.

जेईई, नीट परीक्षेच्या तयारीसाठी विद्यार्थ्यांना पुरेसा वेळ मिळावा, पुरवणी परीक्षा वेळेत घेऊन त्यात उत्तीर्ण विद्यार्थ्यांचे शैक्षणिक वर्ष वाया जाऊ नये, यासाठी बोर्डाने यंदा प्रथमच दहावी-बारावीच्या विद्यार्थ्यांची परीक्षा दहा दिवस अगोदर घेण्याचा निर्णय घेतला. विधानसभेची निवडणूक संपून, निकाल जाहीर होताच बोर्डाने परीक्षांचे वेळापत्रक जाहीर केले आहे.

बारावीच्या विद्यार्थ्यांचे भाषा विषयांचे पेपर सलग होतील, पण त्यानंतरच्या विषयांचे पेपर एक ते तीन दिवसांच्या अंतराने होतील. तर दहावीच्या विद्यार्थ्यांचा पहिला पेपर झाल्यावर त्यांना दुसऱ्या विषयाच्या पेपरसाठी सात दिवसांचा अवधी मिळणार आहेत. या विद्यार्थ्यांचे प्रात्यक्षिक तथा तोंडी परीक्षा फेब्रुवारीच्या पहिल्या आठवड्यात सुरू होईल. दरवर्षी जानेवारीत होणारी सराव परीक्षा आता डिसेंबरमध्ये घेण्याची तयारी शाळा व कनिष्ठ महाविद्यालयांनी सुरू केली आहे. कॉपीमुक्त परीक्षेसाठी यंदा सर्व केंद्रावर सीसीटीव्ही कॅमेरे, विद्यार्थ्यांच्या हॉलमध्ये देखील कॅमेरे असणार आहेत. त्यामुळे परीक्षा केंद्रांवरील गैरप्रकाराला आळा बसेल, असा विश्वास अधिकाऱ्यांनी व्यक्त केला आहे.

‘या’ संकेतस्थळावर पहा वेळापत्रक

महाराष्ट्र राज्य माध्यमिक व उच्च माध्यमिक शिक्षण मंडळाच्या https://mahahsscboard.in/mr या संकेतस्थळावर इयत्ता दहावी व बारावीच्या सर्व अभ्यासक्रमांच्या विद्यार्थ्यांना सविस्तर वेळापत्रक पाहता येणार आहे.

इयत्ता बारावी...

• ११ फेब्रुवारी : इंग्रजी

• १२ फेब्रुवारी : हिंदी

• १३ फेब्रुवारी : मराठी

• १७ फेब्रुवारी : फिजिक्स

• २० फेब्रुवारी : रसायनशास्त्र

• २२ फेब्रुवारी : मॅथेमॅटिक्स

• २५ फेब्रुवारी : सहकार

• २७ फेब्रुवारी : जीवशास्त्र

• १ मार्च : भूशास्त्र, अर्थशास्त्र

• ७ मार्च : भूगोल

• ८ मार्च : इतिहास

• ११ मार्च : समाजशास्त्र

• ------------------

• इयत्ता दहावी

• २१ फेब्रुवारी : मराठी

• १ मार्च : इंग्रजी

• ३ मार्च : हिंदी

• ५ मार्च : गणित भाग-१ (बीजगणित)

• ७ मार्च : गणित भाग-२ (भूमिती)

• १० मार्च : विज्ञान तंत्रज्ञान भाग-१

• १२ मार्च : विज्ञान तंत्रज्ञान भाग-२

• १५ मार्च : समाजशास्त्र भाग-१ (इतिहास व राज्यशास्त्र)

• १७ मार्च : समाजशास्त्र भाग-२ (भूगोल)