टँकर-ट्रक चालकांच्या संपाचा मोठा फटका! पेट्रोल पंपावर रांगा, जाणून घ्या कशी आहे राज्यात स्थिती?

मुंबई- हिट अँड रन कायद्याच्या विरोधात वाहतूकदारांनी तीन दिवसांचा देशव्यापी संप पुकारला आहे. त्याच आज दुसरा दिवस आहे. सोमवारी वाहतूकदारांच्या संपाला काही ठिकाणी हिंसक वळण लागल्याचे पाहायला मिळाले. शिवाय, संपामध्ये मोठ्या प्रमाणात इंधन वाहून नेणाऱ्या ट्रक चालकांचा समावेश असल्याने त्याचा मोठा फटका राज्यात पाहायला मिळाला आहे. (truck driver strike for second day Queues of vehicles at petrol pumps know situation)

इंधन ट्रकांचे चालक संपात सहभागी असल्याने पेट्रोल पंपावर लोकांनी सोमवारी रात्रीपासून मोठ्या प्रमाणात गर्दी केली होती. तेच चित्र आज सकाळी देखील पाहायला मिळाले. अनेक ठिकाणी पेट्रोल पंपावर पेट्रोल-डिझेल संपल्याचा पाट्या लागल्या आहेत. दुसरीकडे, काही जिल्ह्यात पेट्रोल-डिझेल पुरवठा सुरळीत सुरु आहे. नागपूरमध्ये वाहतूकदारांनी संप मागे घेतला आहे.

मुंबई-अहमदाबाद हायवेवरील पेट्रोल पंपावर इंधन संपल्याचा पाट्या लागल्या आहेत. पुणे, पिंपरी-चिंचवड, रत्नागिरी, कोल्हापूर या जिल्ह्यामध्ये पेट्रोल पंपावर इंधन पुरवठा व्यवस्थित सुरु आहे. पण, पेट्रोल-डिझेल मिळण्याचे बंद होण्याच्या शक्यतेने लोकांनी मोठ्या प्रमाणात पेट्रोल पंपावर रांगा लावल्या आहेत. भाजीपाला, अत्यावश्यक वस्तूंचा पुरवठ्यावरही यामुळे परिणाम पडला आहे.

नाशिकमध्ये १ हजार इंधन ट्रक चालक संपावर गेले आहेत. धुळ्यामध्ये पेट्रोल पंपावर मोठ्या प्रमाणात गर्दी झाली आहे. बीडमध्ये देखील अशीच परिस्थिती आहे. वाहनधारकांच्या संपामुळे एसटी बस सेववर देखील परिणाम होणार आहे. संप असाच सुरु राहिला तर पेट्रोल पंपावर इंधन संपण्याची भीती आहे. त्यामुळे लोकांनी पंपावर गर्दी करण्यास सुरुवात केलीये. अनेक ठिकाणी पंप लवकरच बंद होणार असल्याची अफवा पसरली आहे.

ट्रान्सपोर्ट युनियन आणि प्रशासन यांच्यामध्ये झालेली चर्चा सोमवारी निष्फळ ठरली आहे. त्यामुळे मंगळवारीही वाहनचालकांचा संप सुरु आहे. आज संप मिटला नाही तर मोठी अडचण निर्माण होण्याची शक्यता आहे. अनेक पेट्रोल पंपावर एक ते दोन दिवस पुरेल इतकाच इंधन साठा आहे. डिझेल उपलब्ध होत नसल्याने स्कूल बस बंद ठेवण्याचा निर्णय देखील घेण्यात आला आहे. (Latest Marathi News)