Uddhav Thackeray : विधानसभा निवडणुकांच्या तोंडावर ठाकरेंच्या शिवसेनेला मोठा दिलासा! निवडणूक आयोगाने दिली 'ही' परवानगी

नवी दिल्ली : राज्यातील सर्वच राजकीय पक्षांनी आगामी विधानसभा निवडणुकीची तयारी सुरू केली आहे. यादरम्यान उद्धव ठाकरे यांच्या पक्षाला केंद्रीय निवडणूक आयोगाने मोठा दिलासा दिला आहे. विधानसभा निवडणुकांच्या पार्श्वभूमीवर उद्धव ठाकरे यांच्या पक्षाला यापुढे पक्षाला निधी स्वीकारण्यास परवानगी देण्यात आली आहे. त्यामुळे शिवसेना उद्धव बाळासाहेब ठाकरे पक्षाला आता निधी स्वीकारता येणार आहे.

केंद्रीय निवडणूक आयोगाने निधी स्वीकारण्यास ही मंजुरी दिली असून शरद पवार यांच्या मागणीप्रमाणे उद्धव ठाकरे यांनीही केंद्रीय निवडणूक आयोगाकडे मागणी केली होती.

एकनाथ शिंदे यांनी बंडखोरी केल्यानंतर शिवसेना पक्षात उभी फूट पडल्याचे पाहायला मिळाले होते. यानंतर उद्धव ठाकरे विरुद्ध एकनाथ शिंदे असे दोन गट आमने सामने उभे ठाकले. यानंतर निवडणूक आयोगासमोर झालेल्या सुनावणीमध्ये शिवसेना पक्षाचे नाव आणि धनुष्यबाण हे निवडणूक चिन्ह देखील एकनाथ शिंदे यांनी मिळालं.

यानंतर उद्धव ठाकरे यांच्या गटाला शिवसेना उद्धव बाळासाहेब ठाकरे हे नाव आणि मशाल हे निवडणूक चिन्ह स्वीकारावे लागले. दरम्यान आतापर्यंत उद्धव ठाकरेंच्या या पक्षाला निधी स्वीकारण्यास परवानगी नव्हती. यासाठी पक्षाकडून केंद्रीय निवडणूक आयोगाकडे मागणी करण्यात आली होती, अखेर आज ठाकरेंच्या पक्षाला निधी स्वीकारण्यास परवानगी मिळाली आहे.