Uddhav Thackeray : 'मला काही हुडी, गॉगल घालून...'; ठाकरेंचा देवेंद्र फडणवीसांना दिल्लीतून टोमणा

लोकसभा निवडणुकीच्या पार्श्वभूमिवर विरोधकांच्या इंडिया आघाडीतील घटक पक्षांच्या हलचालींना वेग आला आहे. इंडिया आघाडीत सहभागी पक्षांमध्ये जागावाटप आणि समन्वयक इत्यादी मुद्द्यावर चर्चेसाठी आज दिल्लीत काँग्रेसचे राष्ट्रीय अध्यक्ष मल्लिकार्जुन खर्गे यांनी बैठक बोलवली आह. या बैठकीसाठी उद्धव ठाकरे देखील उपस्थित राहाणार आहेत.

दरम्यान मी बऱ्याच दिवसांनी दिल्ली आलोय, इंडिया आघाडीची बैठक होत असून अनेक मुद्यांवर आज चर्चा होईल असे उद्धव ठाकरे यांनी सांगितलं. यावेळी माध्यम प्रतिनिधींनी विचारलेल्या प्रश्नाला उत्तर देताना उद्धव ठाकरेंनी राज्याचे उपमुख्यमंत्री देवेंद्र फडणवीस आणि त्यांच्या पत्नी अमृता फडणवीस यांना टोला लगावल्याचे पाहायला मिळाले.

उद्धव ठाकेरेंना दिल्ली दौऱ्यात कोणा-कोणाला भेटणार असा प्रश्न विचारण्यात आला होता, याला उत्तर देताना उद्धव ठाकरे म्हणाले की, आज मी भेटीगाठी सुरू करेल आणि संध्याकाळी कोणा- कोणाला भेटेल ते मी तुम्हाला सांगेल. मी जरी थंडीमुळे जॅकेट घातलं असेल तरी, हुडी, गॉगल घालून भेटायची काही गरज नाहीये. मी जे करतो ते खुले आम करतो असा खोचक टोला उद्धव ठाकरे यांनी देवेंद्र फडणवीस यांना यावेळी लगावला.

राज्यात महाविकास आघाडीचं सरकार कोसळून जे सत्तांतर झालं त्यावेळी देवेंद्र फडणवीस हे रात्री वेश बदलून एकनाथ शिंदे यांना भेटायला जात होते. हुडी आणि गॉगल घालून ते भेटायला जात होते. त्यांचं हे वेशांतर पाहून मीही त्यांना ओळखत नव्हते, असा खुलासा अमृता फडणवीस यांनी केला होता. याचा संदर्भ देत उद्धव ठाकरे यांनी दिल्लीतून फडणवीसांना टोला लगावला.

दरम्यान शरद पवार हे इंडिया आघाडीचा चेहरा म्हणून कसे वाटतात? या प्रश्नावर माझी मते मी बैठकीत सांगेल काहीही बोलून मी वाद निर्माण करू इच्छित नाही असेही उद्धव ठाकरे म्हणाले. तसेच त्यांनी इंडिया आघाडीतील पक्ष आपचे नेते अरविंद केजरीवाल नाराज नाहीत, मी काल त्यांची भेट घेतली, हसत खेळत वातावरण होत. आजच्या बैठकीसाठी काय मुद्दे असावेत यावर चर्चा झाली, असंही ठाकरे यांनी सांगितलं.