भर दुपारी ते दोघे कंपनीच्या कार्यालयात शिरले.. Rahul Narwekar यांचं नाव घेताच कर्मचारी 'अलर्ट'; विधानसभा अध्यक्ष थेट पोलिस ठाण्यात

मुंबईः विधानसभा अध्यक्ष राहुल नार्वेकर यांच्या नावाने फसवणूक करण्याचा प्रयत्न थोडक्यात टळला आहे. आमदारांना परदेश वारी घडवण्याचं कंत्राट ज्या कंपनीला देण्यात आलंय, त्या कंपनीला फसवण्याचा प्रयत्न झाला. ही बाबा त्या कंपनीच्या कर्मचाऱ्यांना लक्षात आली. नंतर राहुल नार्वेकर यांनीही पोलिसात धाव घेतली आहे.

Rahul Narvekar News vidhan sabha

नेमकं घडलं काय?

विधानसभा आणि विधान परिषद आमदारांना परदेश वारी घडवण्याचे कंत्राट एका टूर्स अँड ट्रॅव्हल्स कंपनीला देण्यात आलेले आहे. या कंपनीच्या कार्यालयात भर दुपारी ३ वाजता दोन व्यक्ती गेले. या दोन्ही आरोपींनी कंपनीच्या कर्मचाऱ्यांकडे विधानसभा अध्यक्ष राहुल नार्वेकर यांच्या नावाने पैशांची मागणी केली.

ते दोघे एवढ्यावरच थांबले नाहीत तर त्यांनी नार्वेकर यांच्याशी फोनवरून संवाद साधून देत बनावही केला. फोनवरुन एका तोतया इसमाने नार्वेकर यांच्या नावाने कर्मचाऱ्याशी बातचित केली. मात्र हे नाटक फारकाळ टिकलं नाही.

याचदरम्यान, संशय आल्याने कंपनीच्या कर्मचाऱ्यांनी सावध होत प्रकरण समजून घेतले. कंपनीच्या कर्मचाऱ्यांनी त्या दोन ठगांना पैसे देण्यास नकार दिला. त्यावेळी दोन्ही आरोपींनी कर्मचाऱ्यास धमकी देऊन तिथून पळ काढला.

हा सर्व प्रकार राहुल नार्वेकर यांना कळाल्यानंतर त्यांनी या प्रकाराची गंभीर दखल घेतली. स्वीय सहाय्यकाकडून नार्वेकरांनी तात्काळ मरीन ड्राईव्ह पोलीस ठाण्यात गुन्हा दाखल केला आहे.