'महत्वाच्या बैठकीला वांझोटी म्हणणाऱ्यांचे तोंडच वांझोटे'

नागपूर : सध्या ओबीसी आरक्षणाचा (OBC reservation) मुद्दा गाजतो आहे. ओबीसींना राजकीय आरक्षण परत मिळावे यासाठी शुक्रवारी सर्वपक्षीय बैठक झाली. मात्र, त्याबाबत ओबीसी नेते आणि माजी ऊर्जामंत्री चंद्रशेखर बावनकुळे (chandrashekhar bawankule) यांनी 'ओबीसींची बैठक वांझोटी होती' अशी टीका केली आहे. त्यालाच आता ओबीसी नेते आणि मदत व पुनर्वसन मंत्री विजय वडेट्टीवार (Minister Vijay wadettiwar) यांनी प्रत्युत्तर दिले आहे.

विजय वडेट्टीवार आज नागपूर दौऱ्यावर आहेत. ओबीसी आरक्षणावरून बावनकुळेंना उत्तर देताना म्हणाले, की 'महत्वाच्या बैठकीला वांझोटी बैठक म्हणणाऱ्यांचे तोंडच वांझोटे आहे. मराठा आरक्षणासंदर्भात आतापर्यंत दहा बैठका झाल्या आहेत. उलट ओबीसी आरक्षणासाठी दोन-तीनच बैठका झाल्या आहेत. कोणाच्या किती बैठका झाल्या हे महत्त्वाचे नसून आरक्षण मिळणे महत्त्वाचा आहे.'

कायदा आणि न्यायाचे काही मुद्दे समोर आले आहेत. इम्पेरिकल डेटा समोर आल्यानंतर काही जिल्ह्यात आरक्षण शून्य होणार आहे. काही जिल्ह्यात आरक्षण आताच्या तुलनेत कमी होईल, तर काही जिल्ह्यात आताच्या तुलनेत वाढणार आहे. त्यामुळे या सर्व मुद्द्यांवर कायदा आणि न्यायव्यवस्थेचे मत जाणून घेणे आवश्यक आहे. त्यामुळे पुढच्या शुक्रवारला या बाबतीत दुसरी बैठक होईल. ती अंतिम बैठक असणार आहे. याबाबत निर्णय पुढील शुक्रवारी होणाऱ्या बैठकीत होईल, असेही वडेट्टीवार यांनी सांगितले.

दरम्यान, शुक्रवारी ओबीसींच्या राजकीय आरक्षणाच्या मुद्द्यावर मुख्यमंत्री उद्धव ठाकरे यांनी सर्वपक्षीय बैठक बोलावली होती. या बैठकीत महत्त्वाची चर्चा झाली असल्याचं काँग्रेस नेते नाना पटोले यांनी सांगितले. ओबीसी आरक्षण कायम ठेवून निवडणुका व्हाव्यात यावर सर्वांची सहमती देखील झाली आहे.