Andheri By-Elections: प्रचार संपला, 'NOTA' गेम सुरु! ठाकरे गटाने केला गंभीर आरोप

अंधेरी पूर्व विधानसभा पोटनिवडणुकीत मतदारांनी इव्हीएमवरचा नोटा (NOTA) पर्याय निवडण्यासाठी पैसे दिले जात असल्याचा गंभीर आरोप उद्धव ठाकरे यांच्या नेतृत्वाखालील शिवसेनेने मंगळवारी केला. पोटनिवडणुकीच्या प्रचाराचा आज शेवटचा दिवस होता जो सायंकाळी ५ वाजता संपला. यादरम्यान उद्धव ठाकरे गटाचे नेते अनिल परब यांनी हा आरोप केला आहे.

उद्धव ठाकरे गटाचे नेते अनिल परब म्हणाले की, त्यांच्या पक्षाने हा मुद्दा निवडणूक आयोगाबरोबरच पोलिसांकडेही उचलला आहे. तसेच आगामी बृहन्मुंबई महानगरपालिका (बीएमसी) निवडणुकीतही याचा प्रभाव पडेल, कारण पहिल्यांदाच महाविकास आघाडीची (एमव्हीए) एकत्रित ताकद दिसून येणार आहे. MVA मध्ये उद्धव यांच्या नेतृत्वाखालील शिवसेना, राष्ट्रवादी आणि काँग्रेस यांचा समावेश आहे. यावेळी निवडणुकीत मतदानाच्या वेळा नोटा हा पर्याय निवडण्यासाठी लोकांना पैसे दिले जात असल्याचा आरोप त्यांनी केला.

माजी मंत्री परब पुढे म्हणाले की त्यांच्या पक्षाकडे अशा कृत्यांच्या व्हिडिओ क्लिप आहेत ज्यात रिपब्लिकन पार्टी ऑफ इंडिया (आरपीआय) चे कथित कार्यकर्ते दिसत आहेत. रामदास आठवले यांच्या नेतृत्वाखालील आरपीआय राष्ट्रीय लोकशाही आघाडीचा (एनडीए) भाग आहे.

शिवसेना उद्धव बाळासाहेब ठाकरे पक्षाने माजी आमदार रमेश लटके यांच्या पत्नी रुतुजा लटके यांना उमेदवारी दिली आहे. रमेश लटके यांच्या निधनानंतर ही जागा रिक्त झाल्याने या पोटनिवडणुका घ्याव्या लागणार आहेत.

तर भाजपने मुरजी पटेल यांना उमेदवारी दिली होती, पण नंतर पक्षाने निवडणूक न लढवण्याचा निर्णय घेतला आणि उमेदवारी मागे घेतली. एकीकडे, मृत आमदाराच्या कुटुंबातील सदस्याविरुद्ध उमेदवार न देण्याच्या परंपरेचा आदर करतो, असे सांगत भाजपने आपला उमेदवार मागे घेतला, असे परब म्हणाले. तर दुसरीकडे लोकांना नोटांसाठी मतदान करण्यास सांगितले जात आहे असे ते म्हणाले आहेत.

लटके यांना 98-99 टक्के मते मिळतील असा विश्वास त्यांनी व्यक्त केला आणि पतीच्या निधनामुळे अपूर्ण राहिलेली कामे पूर्ण करणार असल्याचे परब म्हणाले.