Weather Update : कुठे उन्हाचा तडाखा तर कुठे अवकाळी पावसाचा तडाखा; वाचा हवामान विभागाचा अंदाज?

राज्यातील थंडी आता कमी होण्यास सुरवात झाली आहे. काही ठिकाणी उन्हाचा तडाखा जाणवत आहे. तर राज्यातील काही जिल्हांमध्ये ढगाळ वातावरण निर्माण झाल्याने काही जिल्ह्यांमध्ये अवकाळी पावसाच्या सरी कोसळत आहे. विदर्भातील अनेक जिल्ह्यांना गारपीटीने तडाखा बसला आहे. त्यामुळे शेतीपिकांचं मोठं नुकसान झालं आहे. हवामान विभागाने आजही राज्यात पावसाचा इशारा दिला आहे.(weather update Maharashtra)

आज आणि उद्या (मंगळवारी, बुधवारी) राज्यातील विविध भागात हलक्या ते मध्यम स्वरुपाच्या पावसाची शक्यता असा पुणे हवामान विभागाने वर्तवला आहे. विदर्भात पुढील 2-3 दिवस अवकाळी पावसाची शक्यता असून मराठवाड्यातील काही जिल्ह्यातही पावसाचा अंदाज हवामान विभागाने वर्तवला आहे.

हवामान विभागाच्या माहितीनुसार, पुढील ४८ तासांमध्ये विदर्भ आणि मराठवाड्याच्या काही भागात विजांच्या कडकडाटांसह हलक्या ते मध्यम पावसाची शक्यता आहे. विदर्भातील नागपूर, वर्धा, अमरावती, अकोला, वाशिम, बुलढाणा, यवतमाळ, चंद्रपूर, गडचिरोली, गोंदिया आणि भंडारा या जिल्ह्यांमध्ये पावसाचा इशारा देण्यात आला आहे. काही जिल्ह्यांमध्ये गारपीट होण्याची शक्यता आहे, असंही हवामान विभागाने सांगितलं आहे .

जालना, परभणी आणि हिंगोली जिल्ह्यात हलक्या ते मध्यम स्वरुपाच्या पावसाची शक्यता आहे. तर उर्वरित राज्यात मात्र ढगाळ वातावरण राहील, असंही हवामान खात्याने सांगितलं आहे.