Weather Update: राज्यात ऐन दिवाळीत बसरणार पावसाच्या सरी; हवामान विभागाने दिली माहिती

ऐन दिवाळी सणाच्या दरम्यान वातावरणात मोठे बदल दिसून येत आहेत. ऐन हिवाळ्यामध्ये ढगाळ वातावरण तयार झाले असून देशासह राज्यातील काही भागांमध्ये पावसाने हजेरी लावली आहे. दिवाळीमध्ये कधी उकाडा, कधी थंडी तर कधी पाऊस असं वातावरण दिसत आहे. तर काल (बुधवारी) कोकणासह अनेक भागांमध्ये पावसाच्या जोरदार सरी बरसल्या.

अरबी समुद्रात कमी दाबाचं क्षेत्र तयार झालं आहे. त्यामुळे राज्याच्या काही भागांमध्ये सध्या पाऊस हजेरी लावत आहे. शुक्रवार म्हणजेच 10 नोव्हेंबरपर्यंत कोकण आणि दक्षिण महाराष्ट्रात हलका ते मध्यम स्वरूपाच्या पावसाची शक्यता वर्तवण्यात आली आहे.

मात्र, शनिवारनंतर राज्यात सगळीकडेच हवामान कोरडं राहील, असा अंदाज हवामान विभागाने व्यक्त केला आहे. तर काल (बुधवारी) कोल्हापूर, सांगली, सातारा, कोल्हापूर आणि पुण्याच्या काही भागांमध्ये हलका ते मध्यम स्वरुपाचा पाऊस झाला आहे.

आजही राज्याच्या काही भागात तुरळक ठिकाणी पावसाची शक्यता आहे. मात्र, अरबी समुद्रातील कमी दाबाचं क्षेत्र हळूहळू कमी होत आहे. त्यामुळे शनिवारनंतर राज्यातील हवामान पूर्णपणे निरभ्र होईल, असा अंदाज हवामानशास्त्र विभागाने वर्तवला आहे.

ऐन खरीप हंगामामध्ये पिके काढणीला असताना अवकाळी पावसाचं संकट ओढवल्याने शेतकऱ्यांचं टेन्शन वाढलं आहे. अशातच हवामान विभागाने पुन्हा एकदा राज्यातील काही जिल्ह्यांमध्ये अवकाळी पावसाचा इशारा आहे. येत्या २४ तासांत मुंबई, ठाणे, पुणे, कोकण मध्य महाराष्ट्रात पावसाच्या हलक्या सरी कोसळतील असा अंदाज हवामान खात्याने वर्तवला आहे.

याशिवाय मराठवाडा आणि विदर्भातील काही जिल्ह्यांनाही अवकाळी पावसाचा फटका बसण्याची शक्यता वर्तवण्यात आली आहे. अरबी समुद्रात तयार झालेल्या कमी दाबाच्या पट्ट्यामुळे राज्यात ढगाळ वातावरण निर्माण झालं आहे.