'माझी संपूर्ण मालमत्ता बॉम्बने उडवून द्या, पण दहशतवाद्यांना..'; ताज हॉटेलवरील हल्ल्यानंतर काय म्हणाले होते रतन टाटा?

Ratan Tata Passed Away : देशातील प्रसिद्ध उद्योगपती रतन टाटा यांचं वयाच्या 86 व्या वर्षी मुंबईतील ब्रीच कँडी रुग्णालयात (Breach Candy Hospital) निधन झालं. भारतासह जगातील लोक रतन टाटा यांना त्यांच्या साध्या स्वभावामुळे ओळखायचे. कर्मचाऱ्यासांठी ते देवासमान होते. मुंबईतील 26/11 च्या दहशतवादी हल्ल्यात दहशतवाद्यांनी प्रसिद्ध ताज हॉटेललाही (Taj Hotel Terror Attack) लक्ष्य केलं होतं.

त्यादिवशी या घटनेचा उल्लेख रतन टाटा यांनी एका मुलाखतीत केला होता. त्यांनी सांगितलं की, हॉटेलमध्ये गोळीबार झाल्याचा मला कोणाचा तरी फोन आला होता. यानंतर मी ताज कर्मचाऱ्यांना माहितीसाठी फोन केला; पण त्यांनी माझा फोन उचलला नाही. मी माझी गाडी काढली आणि ताजला पोहोचलो, पण चौकीदाराने मला बाहेरच थांबवलं, कारण तिथं गोळीबार सुरू होता.

'एकही दहशतवादी जिवंत राहता कामा नये'

यावेळी त्यांनी तिथं उपस्थित सुरक्षा जवानांना सांगितलं की, जर गरज असेल तर माझी संपूर्ण मालमत्ता बॉम्बने उडवून द्या, मला त्याची चिंता नाही; पण एकही दहशतवादी जिवंत राहता कामा नये. रतन टाटा यांनी पुढं सांगितलं की, त्यावेळी ताज हॉटेलमध्ये 300 पाहुणे उपस्थित होते. उपाहारगृहे भरलेली होती. तिथं उपस्थित कर्मचाऱ्यांनी सर्वांना सुरक्षित स्थळी पोहोचवण्याचा प्रयत्न केला. त्या काळात अनेकांचे बळीही गेले. त्या तीन दिवस आणि तीन रात्री रतन टाटा ताज हॉटेल व्यवस्थापनाच्या पाठीशी उभे राहिल्याचे त्यांनी मुलाखतीत सांगितले.

'..तर ताज आज जसा आहे, तसा तो कधीच बनला नसता'

व्यवस्थापन आणि सहकाऱ्यांच्या पाठीशी रतन टाटा नेहमीच उभे राहिले. ताज हॉटेलबद्दल ते म्हणायचे की, ''त्याची भव्यता असूनही, त्याच्या मागे काम करणाऱ्या लोकांची मेहनत नसती तर ताज आज जसा आहे तसा तो कधीच बनला नसता. ते (कर्मचारी) स्वत:चा जीव धोक्यात घालून उपस्थित लोकांना वाचवण्यासाठी स्वत:चा जीव गमावून उभा राहिला.''