Winter Cold : उत्तर महाराष्ट्रात वाढतोय गारठा!

पुणे - उत्तरेकडून येणाऱ्या थंड वाऱ्यांचा प्रभाव वाढू लागल्याने उत्तर महाराष्ट्रात गारठा जाणवू लागला आहे. राज्यातील कोरडे हवामान आणि किमान तापमानासह कमाल तापमानातही सातत्याने होणारी घट यामुळे राज्यात हळूहळू थंडीची चाहूल लागली आहे. राज्यात जळगाव येथे ११ अंश सेल्सिअस अशा नीचांकी तापमानाची नोंद गुरुवारी झाली.

अरबी समुद्र आणि बंगालच्या उपसागरातील दोन्ही चक्रीवादळ निवळली आहेत. दरम्यान, उत्तरेकडून येणाऱ्या थंड वाऱ्यांचा प्रभाव वाढू लागला आहे. त्यामुळे हे थंड वारे राज्यातून वाहू लागण्याची चिन्हे आहेत. त्यामुळे नागरिकांना हवीहवीशी वाटणारी थंडी लवकरच जाणवण्याची शक्यता आहे.

उत्तर महाराष्ट्रातील जळगावसह मध्य महाराष्ट्रातील सांगली, सातारा, सोलापूर; मराठवाड्यात छत्रपती संभाजीनगर, परभणी, नांदेड, बीड आणि विदर्भात अकोला, अमरावती, बुलडाणा, ब्रह्मपुरी, चंद्रपूर, गोंदिया, नागपूर, वर्धा, यवतमाळ येथे किमान तापमानात घट झाली आहे.

पुणे आणि परिसरात पुढील दोन ते तीन दिवसांत आकाश मुख्यत: निरभ्र राहण्याची शक्यता आहे, अशी माहिती भारतीय हवामानशास्त्र विभागाने दिली आहे. पुण्यात १७.३ अंश सेल्सिअस इतके किमान तापमान गुरुवारी नोंदविले गेले.