तुम्ही आताच ‘हे’ नंबर तोंडपाठ करा! कधीही अडचण पडल्यास काही वेळातच मिळेल हमखास मदत

सोलापूर : अडचणीतील व्यक्तींना पोलिसांची मदत कशी मिळवायची, त्यासाठी मोबाईलमधील रिचार्ज संपलेला असतानाही कॉल लागतो याची माहिती बहुधा नसते. आपल्या आजूबाजूला अवैध दारू विक्री होते आणि त्याचा त्रास सर्वांनाच सोसावा लागतो, मग अशावेळी कोणत्या क्रमांकावर कॉल करून तक्रार करायची, गावात बालविवाह होतोय तर त्याची तक्रार कोठे करायची याची देखील माहिती नसते. अपघात झाल्यावर किंवा इतर गंभीर व्यक्तींना वैद्यकीय मदत कोणत्या क्रमांकावर मिळते, याची माहिती असणे आवश्यक असते. या पार्श्वभूमीवर सर्व व्यक्तींना काही क्रमांक तोंडपाठ असणे आवश्‍यक आहे.

कोरोनाच्या तीन लाटा येऊन गेल्यानंतर अनेकांना वैद्यकीय तज्ज्ञांचा मानसिक सल्ला जरुरी बनला आहे. तर शिक्षण घेताना किंवा परीक्षेनंतर आलेल्या अपयशामुळे देखील तरुण- तरुणींना नैराश्यातून बाहेर काढण्यासाठी मानसिक सल्ला जरुरी असतो. महामार्गावरून जाताना गंभीर अपघात झाल्यावर जखमींना वेळेत उपचार मिळाल्यास त्या रुग्णांचा जीव वाचू शकतो.

गर्भवतींना रूग्णालयात नेण्यासाठी देखील आरोग्य विभागाने टोल फ्री क्रमांक दिला आहे. हे क्रमांक माहिती असल्यास आपत्कालीन परिस्थिती तातडीने मदत मिळू शकते. आता नववर्षाच्या पार्श्वभूमीवर अवैध दारू विक्री किंवा दारू वाहतूक होत असल्यास त्याची तक्रार राज्य उत्पादन शुल्क विभागाकडे करता येईल. त्यासाठी त्यांचाही टोल फ्री क्रमांक आहे. बालविवाह, लाच प्रकरणात संबंधित जबाबदार व्यक्तींवर कारवाई करण्यासाठी कोणालाही त्या त्या विभागांच्या टोल फ्री क्रमांकावर कॉल करून तक्रार करता येते. असे क्रमांक तोंडपाठ असणे किंवा प्रत्येकाच्या मोबाईलमध्ये साठवून ठेवणे काळाची गरज बनली आहे.

प्रत्येकालाच ‘या’ क्रमांकाचा होईल लाभ

• - बालविवाह रोखण्यासाठी : १०९८

• - लाच प्रकरणी तक्रारीसाठी : १०६४

• - पोलिस मदतीसाठी : ११२

• - अवैध दारूच्या तक्रारीसाठी : १८००२३३९९९९

• - आपत्कालीन वैद्यकीय सेवा : १०८

• - आरोग्य सल्ला, रक्ताची उपलब्धता : १०४

• - गर्भवतींसाठी मोफत रुग्णसेवा : १०२

• - आग लागल्यावर मदत : १०१

• - म.फुले जनआरोग्य योजना : १५५३८८

• - गर्भधारणापूर्व निदान : १८००२३३४४७५

• - आरोग्याविषयीचा राष्ट्रीय कॉल सेंटर : ९१-११-२३९७८०४६

• - ‘ई-संजीवनी’ आरोग्याचा सल्ला : १०७५

• - मानसिक आरोग्य पुनर्वसनाचा सल्ला : १८००५००००१९

• - कोरोनाविषयी माहिती : १०४

• - व्यसनमुक्ती : १८००११२३५६

• - क्षयरोग विषयी मार्गदर्शन : १८००११६६६६

• - कुष्ठरोग विषयक मार्गदर्शन : ०२२-२४११४०००

• - महिला व बालविकास विषयक सेवा : ८०८०८०९०६३

• - आपत्ती व्यवस्थापनासंबंधी मार्गदर्शन : १०७७

पोलिसांची मदत १५ मिनिटांतच

शहर असो वा ग्रामीण भागातील व्यक्तींवर काही संकट ओढवल्यास त्यांना पोलिसांच्या ११२ या टोल फ्री क्रमांकावर थेट संपर्क करून मदत मिळविता येते. शहरातील संकटग्रस्त व्यक्तींना अवघ्या १० मिनिटात तर ग्रामीणमधील व्यक्तींना १५ ते २० मिनिटांत मदत मिळते. त्यामुळे प्रत्येकांनी विशेषतः मुली- महिलांनी ११२ हा क्रमांक तोंडपाठ करावा, असे आवाहन पोलिसांनी केले आहे.