CDS जनरल बिपीन रावत यांचे छत्रपती घराण्याशी जिव्हाळ्याचे संबंध

भारताचे पहिले CDS जनरल बिपीन रावत यांचे हेलिकॉप्टर दुर्घटनेत निधन झाले. त्यांच्यासह पत्नी मधुलिका रावत यांचाही अपघाती मृत्यू झाला. भारताच्या सुरक्षेची मोठी जबाबदारी पेलणाऱ्या बिपीन रावत यांच्या अचानक जाण्यानं सर्वांनाच धक्का बसला आहे. अनेक क्षेत्रातील मंडळी दुर्देवी घटनेवर प्रतिक्रिया देऊन बिपीन रावत यांच्यासह अपघातातील मृत्यू झालेल्यांबद्दल हळहळ व्यक्त करत आहेत. खासदार युवराज संभाजीराजे छत्रपती (भोसले) यांनीही बिपीन रावत आणि त्यांची पत्नी मधुलिका रावत यांच्या आठवणींना उजाळात देत त्यांना श्रद्धांजली वाहिली आहे.

चीफ ऑफ डिफेन्स स्टाफ जनरल बिपीन रावत आणि मधुलिका रावत यांचे छत्रपती घराण्याचे जिव्हाळ्याचं नाते होते. छत्रपती शिवाजी महाराज चरित्र अभ्यासक लष्करप्रमुख आपल्यातून निघून गेले, ही गोष्ट मनाला अजूनही पटत नाही, अशी भावना संभाजीराजे यांनी व्यक्त केली आहे. बिपीन रावत यांच्या आठवणींना उजाळा देताना संभाजी राजे यांनी फेसबुक पोस्ट लिहिलीये. यात त्यांना बिपीन रावत यांच्यासोबतच्या आठवणींना उजाळा दिलाय. 2017 मध्या राजधानी दिल्लीत शिवजयंती महोत्सव पार पडला होता. या कार्यक्रमाला जनरल रावत अभिमानाने उपस्थित राहिले होते. 2019 मध्ये पश्चिम महाराष्ट्रात आलेल्या महापुरात मदतकार्य राबविण्यासाठी त्यांचे खूप मोठे सहकार्य लाभले होते.

छत्रपती शिवाजी महाराज आणि संपूर्ण छत्रपती घराण्याविषयी त्यांच्या मनात खूप आदर आणि अभिमानाची भावना होती. त्यांना छत्रपती शिवाजी महाराजांचे तैलचित्र भेट दिले होते. यावेळी ते खूप आनंदी दिसले. एवढेच नाही तर दिल्लीतील निवास्थानीही बिपीन रावत यांनी भेट दिली होती. यावेळी माझ्या निवासस्थानी असलेले ताराबाई महाराणी साहेबांचे तैलचित्र पाहून त्यांनी उत्सुकतेने माहिती जाणून घेतली होती. युद्धशास्त्रात त्यांचा इतिहास शिकवला जावा, यासाठी प्रयत्नशील राहीने, असेही ते म्हणाले होते, अशी आठवण संभाजी राजेंनी शेअर केलीये.