'कोरोनाने घात केला, माझा आधारवड हरपला'; वडिलांच्या निधनानंतर अभिनेत्री भावूक

'आई कुठे काय करते' Aai Kuthe Kay Karte या मालिकेत अनघाची भूमिका साकारणारी अभिनेत्री अश्विनी महांगडेच्या Ashwini Mahangade वडिलांचं कोरोनाने निधन झालं. वडील प्रदीपकुमार सदाशिव महांगडे यांच्या निधनानंतर अश्विनीने सोशल मीडियावर पोस्ट लिहित तिच्या भावनांना वाट मोकळी करून दिली. 'कोरोनाने घात केला, माझा आधारवड हरपला', अशा शब्दांत अश्विनीने तिच्या भावना व्यक्त केल्या. (aai kuthe kay karte fame actress ashwini mahangade lost her father)

'कधी कधी स्वत:चे कपडे फाटलेले असले तरी शेवटपर्यंत लोकांसाठी करीत राहिले आणि मलाही तेच शिकवले. गेले १५ दिवस कोरोनाशी वाघासारखे लढले, पण अखेरीस ही झुंज अपयशी ठरली. काळाने घाला घातला आणि आम्हाला पोरके केले. काल जाता जाता एक सांगून गेले- समाजासाठी काही केले नाही तर आपले आयुष्य निरर्थक. नाना, माझ्या यशाचं गुपित, माझे लढण्याचे बळ, माझे मार्गदर्शक, माझी ताकद, माझा पाठीराखा, माझा बापमाणूस', अशी पोस्ट अश्विनीने लिहिली.

वडिलांप्रमाणे अश्विनीनेही कोरोना काळात अनेकांची मदत केली. रयतेचे स्वराज्य प्रतिष्ठान या संस्थेमार्फत ती कोरोनाग्रस्त कुटुंबीयांसाठी मोफत जेवणाची सोय करते.

अश्विनीने 'स्वराज्यरक्षक संभाजी' या मालिकेत राणू आक्का साहेबांची भूमिका साकारली होती. ती सध्या 'स्टार प्रवाह' वाहिनीवरील 'आई कुठे काय करते' या मालिकेत अनघाची भूमिका साकारत आहे. अश्विनीने मालिकांसोबतच काही चित्रपटांमध्येही काम केलं आहे.