आई कुठे काय करते: देशमुखांच्या घरातनंच नाही, मालिकेतूनच एक्झिट;कोणाची?

'आई कुठे काय करते'(Aai Kuthe Kay Karte) ही मालिका खूप साधी,सरळ वाटते, इतर मालिकांप्रमाणे या मालिकेत ना किचन पॉलिटिक्स कधी पहायला मिळतं,ना कधी भरजरी साड्यात मेकअप केलेला महिला वर्ग ना कधी उगाचच आक्रास्ताळेपणा केलेल्या दृश्यांचा भडीमार या मालिकेत दिसतो. या मालिकेतील अरुंधती,अनिरुद्ध,संजना या पात्रांबरोबर इतर सगळीच पात्र प्रेक्षकांच्या मनात आपलं घर करुन राहिले आहेत. अनिरुद्धला लोकं त्याच्या वागण्यावरुन शिव्या जरी देत असले ना तरी ती त्याच्या भूमिकेला मिळालेली पसंतीची पोचपावतीच म्हणावी लागेल. आता मालिकेत काही अशी रंजक वळणं आली आहेत ज्यामुळे काही दिवसांपूर्वी मागे पडलेली ही मालिका पुन्हा नंबर वन पदावर येऊन पूर्ववत विराजमान झाली आहे.

अरुंधतीनं(Arundhati) आता देशमुखांचं घर सोडलं आहे. एक रात्र काय तिला रेकॉर्डिंगच्या निमित्तानं बाहेर गेलेली असताना परतीच्या वाटेवर अडचण येते म्हणून मित्रासोबत काढावी लागते, तर देशमुख ज्यांचा खरंतर तिला उलट-सुलट विचारण्याचा अधिकारच नाही ते सरळ तिच्यावर आरोपाच्या फैरी झाडतात. स्वाभिमानी अरुंधती तिथनं तडक बाहेर पडते अन् आता तर ती स्वतंत्र राहायला लागणार आहे. अर्थात हे असं सगळं रंजक सुरू आहे मालिकेत. आशुतोष-अरुंधतीच्या मैत्रीचा ट्रॅकही लोकांना आवडू लागला आहे. पण त्यातच आता बातमी आहे की मालिकेतनं अरुंधतीच्या जवळची खास अशी विमल या मालिकेतनंच बाहेर पडत आहे. विमल म्हणजे देशमुखाच्या घरात किचनची जबाबदारी इतर छोटीमोठी कामं सांभाळणारी महत्त्वाची व्यकती. जिच्या न येण्यानं देशमुखांच्या घरची घडी बिघडलेली दाखवायचे.

तर अशी ही 'विमल' ची व्यक्तिरेखा सीमा घोगले या अभिनेत्रीनं साकारली होती. पण अचानक असे काय झाले की मालिकेचा टीआरपी ग्राफ वर चढत असताना,विमल या व्यक्तीरेखेला तितकंच महत्त्व मिळत असताना अचानक सीमा घोगलेनं मालिका सोडण्याचा निर्णय घेतला. पण आता कळत आहे की,सोनी मराठीवर 'बॉस माझी लाडाची' या मालिकेत सीमा घोगले महत्वाच्या भूमिकेत दिसणार आहे. अर्थात त्यामुळेच तिनं 'आई कुठे काय करते' मालिकेतील विमलच्या व्यक्तीरेखेवर पाणी सोडलं असणार हे मात्र निश्चित.