घटस्फोटानंतर आमिर-किरणची पहिली मुलाखत; म्हणाले...

बॉलिवूडचा मिस्टर परफेक्शनिस्ट म्हणून ओळखला जाणारा अभिनेता आमिर खान आणि किरण राव यांनी घटस्फोट घेत असल्याचं जाहीर केलं. १५ वर्षांच्या संसारानंतर या दोघांनी विभक्त होण्याचा निर्णय घेतला. दोघांच्या चाहत्यांना त्यांच्या या निर्णयामुळे धक्का बसला. त्यांनी घटस्फोट का घेतला, या दोघांमध्ये नेमकं काय बिनसलं, असे प्रश्न चाहत्यांमध्ये उपस्थित होत होते. आमिर आणि किरणने नुकतीच एक मुलाखत दिली आहे. या मुलाखतीमध्ये किरण आमिरच्या शेजारी बसलेली आहे. दोघांच्या घटस्फोटानंतरच्या या पहिल्या मुलाखतीची चर्चा सोशल मीडियावर होत आहे. (aamir khan kiran rao hold hands address fans after divorce announcement)

मुलाखतीमध्ये आमिर म्हणाला, 'तुम्ही खूप दु:खी झाला असाल. तुम्हाला वाईट वाटले असेल. पण आम्ही तुम्हाला हे सांगू इच्छितो की आम्ही दोघेही आनंदी आहोत. आम्ही एकत्र कुटुंबाच आहोत. आमच्या नात्यामध्ये थोडा बदल झाला आहे. पण आम्ही एकमेकांच्यासोबत आहोत. पानी फाऊंडेशन ही संस्था आमच्या मुलासारखी म्हणजेच आझादसारखी आहे. आम्ही नेहमी एकत्र एका कुटुंबाप्रमाणेच राहणार आहोत. तुमचा सर्वांचा आशीर्वाद आमच्यासोबत असूदेत.'

घटस्फोट घेण्याच्या निर्णय घेतल्यानंतर आमिर आणि किरणने स्पष्ट केले होते की, 'या सुंदर १५ वर्षांमध्ये आम्ही आयुष्यभराचा आनंद, हास्य यांचा अनुभव घेतला आणि त्यातून या नात्यात एकमेकांविषयी आदर, प्रेम आणि विश्वास वाढला. आता आम्हाला आमच्या आयुष्यातील एक नवीन प्रवास सुरू करायला आहे. पण पती-पत्नी म्हणून नाही तर पालक आणि एकमेकांचे कुटुंब म्हणून. विभक्त होण्याची प्रक्रिया काही दिवसांपूर्वीच सुरू झाली होती आणि आता आम्ही दोघं वेगवेगळे राहत आहोत. मुलगा आझादचं संगोपन आम्ही दोघं मिळून करणार आहोत. त्याचप्रमाणे आम्ही चित्रपट, पानी फाऊंडेशन आणि इतर प्रोजेक्ट्सवर सोबत काम करणार आहोत. कुटुंबीय आणि मित्रमैत्रिणींचे खूप आभार, कारण त्यांनी या निर्णयात आमची साथ दिली आणि आम्हाला समजून घेतलं. आमच्या हितचिंतकांनीही शुभेच्छा आणि आशीर्वाद आम्हाला द्याव्यात. घटस्फोट म्हणजे शेवट नसून एका नव्या प्रवासाची सुरुवात आहे'