KRK Arrested: अभिनेता - समीक्षक कमाल आर. खानला मुंबईत अटक, सलमानवर केला गंभीर आरोप, वाचा संपूर्ण प्रकरण

KRK kamal r khan Arrested News: अभिनेता - समीक्षक कमाल आर. खान जो के.आर.के. नावाने लोकप्रिय आहे त्याला अटक करण्यात आल्याची मोठी बातमी समोर येतेय. कमाल एक फिल्म समीक्षक आणि अभिनेता आहे.

के.आर.के. हा फिल्म समीक्षक म्हणून लोकप्रिय आहे. तो अनेकदा बॉलिवूड सिनेमांची विडंबनात्मक समीक्षा करत असतो. अटक झाल्यावर के.आर.के.ने सलमान खानवर गंभीर आरोप केले आहेत. वाचा संपूर्ण प्रकरण

अभिनेता आणि चित्रपट निर्माता कमाल आर खान याला 2016 च्या एका प्रकरणात मुंबईत अटक करण्यात आली आहे. के.आर.केने आपल्या X हँडलवर ही बातमी शेअर केली.

त्याने ट्विट केलंय की, “मी गेल्या एक वर्षापासून मुंबईत आहे. आणि मी माझ्या सर्व न्यायालयीन तारखांना नियमितपणे उपस्थित राहतो. आज मी नवीन वर्षासाठी दुबईला जाणार होतो. पण मुंबई पोलिसांनी मला विमानतळावर अटक केली. पोलिसांनी दिलेल्या माहितीनुसार, मी 2016 च्या एका प्रकरणात वॉन्टेड आहे."

के.आर. केने पुढे सलमान खानचा उल्लेख करत म्हटलंय, "सलमान खान म्हणतोय की त्याचा #Tiger3 हा चित्रपट माझ्यामुळे फ्लॉप झाला आहे. पोलीस ठाण्यात किंवा तुरुंगात कोणत्याही परिस्थितीत माझा मृत्यू झाला तर तुम्हा सर्वांना कळले पाहिजे की तो खून आहे. आणि तुम्हाला माहित आहे, यासाठी कोण जबाबदार आहे!."

कमाल आर खानला कायदेशीर अडचणींचा सामना करण्याची ही पहिलीच वेळ नाही. 2022 मध्ये त्याला दोनदा अटक करण्यात आली होती. सुरुवातीला, दिवंगत अभिनेते इरफान आणि ऋषी कपूर यांच्याबद्दल कथित वादग्रस्त ट्विट शेअर केल्याबद्दल त्याच्यावर आरोप झाले. नंतर सप्टेंबरमध्ये, त्याला पुन्हा अटक करण्यात आली, यावेळी त्याच्या फिटनेस ट्रेनरवर लैंगिक अत्याचार केल्याप्रकरणी त्याला अटक करण्यात आली होती.