'इतरांच्या टीका सहन करणं कठीण होईल, पण..'; अजयचं स्वत:लाच पत्र

स्वामी विवेकानंद यांचा जयंती दिन भारतात राष्ट्रीय युवा दिन म्हणून साजरा केला जातो. या दिवसाचं औचित्य साधत अभिनेता अजय देवगणने (Ajay Devgn) स्वत:साठीच एक पत्र लिहिलं आहे. २० वर्षीय अजयसाठी त्याने हे पत्र लिहिलं असून #NationalYouthDay असा हॅशटॅग त्याला दिला आहे.

अजय देवगणचं पत्र-

'प्रिय २० वर्षीय मी, या नवीन जगात अभिनेता म्हणून तू तुझा ठसा उमटवण्याचा प्रयत्न करतोयस. प्रामाणिकपणे सांगायचं झाल्यास, तुला काही अत्यंत वाईट नकारांचा सामना करावा लागणार आहे. स्वभावाने थोडासा लाजरा-बुजरा असलेला तू या सर्वांत आपलं स्थान निर्माण करण्याचा, त्यात फिट होण्याचा खूप प्रयत्न करशील, पण त्यात तू अयशस्वी होशील. लोकांच्या टीकाटिप्पणी आणि त्यांच्या शंका या पचवणं खूप कठीण असतील. त्यामुळे तुझ्या स्वप्नांवर प्रश्नचिन्ह निर्माण होईल. यशस्वी होण्याचा प्रयत्न करत असताना अनेकदा अपयश तुझ्या हाती येईल. पण हे सर्व खूप फायदेशीर ठरणार आहे. हळूहळू का होईना, एक दिवस तुला जाणवेल की, स्वतःचं अस्तित्व ही तुझी सर्वांत मोठी ताकद आहे. म्हणूनच, थोडासा अडखळलास तरी थांबू नकोस. तू प्रयत्न करत राहा आणि जगाच्या अपेक्षांना स्वत:वर लादू नकोस. जसा आहेस तसाच राहा. त्यातच तुझा खरेपणा आहे,' असं पत्र ५२ वर्षीय अजयने २० वर्षीय अजयला लिहिलं आहे.

'ता. क.- डान्स कसा करायचा ते शिकून घे, तुला पुढे ते उपयोगी पडेल', असा सल्ला या पत्राच्या शेवटी त्याने दिला आहे. 'तुझ्यापेक्षा वयस्कर, थोडासा बुद्धिवान आणि थोडा तुझ्यापेक्षा चांगला दिसणारा', असं त्याने आताच्या अजयचं वर्णन केलं आहे. अजयच्या या पत्रावर अनेक चाहत्यांनी प्रतिक्रियांचा पाऊस पाडला आहे. '२० वर्षीय अजयला तुझा खूप अभिमान वाटला पाहिजे', असं एकाने लिहिलं. तर 'हे आताच्या तरुणाईसाठी आहे, तुम्ही ग्रेट आहाता', असं दुसऱ्याने म्हटलं.

अजय 'सूर्यवंशी' या चित्रपटात झळकला. लवकरच तो 'RRR' या एस. एस. राजामौली दिग्दर्शित चित्रपटात भूमिका साकारताना दिसणार आहे. हा चित्रपट जानेवारी महिन्यात प्रदर्शित होणार होता. मात्र कोरोना महामारीमुळे प्रदर्शनाची तारीख पुढे ढकलण्यात आली आहे. अजयचा 'मैदान' हा चित्रपटसुद्धा लवकरच प्रेक्षकांच्या भेटीला येणार आहे.