लग्नाआधी आलियाला सैफच्या मुलाचा पर्सनल मेसेज,म्हणालेला,'खास वेळ काढून मी..'

मोठ्या पडद्यावर आपल्या अभिनयानं सगळ्यांची मनं जिंकणाऱ्या आलिया भट्टनं(Alia Bhatt) रियल लाइफमधील एक भन्नाट किस्सा करण जोहरच्या 'कॉफी विथ करण'च्या सातव्या सिझनमध्ये ऐकवला. यावेळी आलियासोबत रणवीर सिंगही(Ranveer Sing) गेस्ट म्हणून करणच्या शो मध्ये उपस्थित होता. दोघांनीही आपल्या वैयक्तिक आयुष्यापासून प्रोफेशनल लाइफपर्यंतचे सगळे किस्से शेअर केले. त्याचवेळी आलियानं हा मजेदार किस्सा शेअर केला. हा किस्सा सैफ अली खानचा मुलगा इब्राहिम अली खानशी जोडलेला आहे.(Alia Bhatt received a special message from Ibrahim Ali Khan,Reveal In 'Koffee with karan 7' show)

'कॉफी विथ करण ७' च्या शो मधील रॅपिड राऊंड मध्ये करण जोहरने आलियाला संजय लीला भन्सालींचा सिनेमा 'गंगूबाई काठियावाडी' संदर्भात काही प्रश्न विचारले. गंगूबाई भूमिकेसाठी आलियाला कोणी सगळ्यात बेस्ट कॉम्प्लिमेंट दिली अशी विचारणा केली. यावर आलियाने इब्राहिम अली खानचे नाव घेतले. आलियानं एवढचं नाही तर आपल्या फोनवर त्यानं केलेला तो पर्सनल मेसेज वाचूनही दाखवला. आलिया इब्राहिम अली खानच्या त्या मेसेजला वाचताना हसून हसून लोटपोट झाली.

इब्राहिमनं आलियाला लिहिलेल्या त्या मेसेजमध्ये लिहीलं होतं की,''तुला हा पर्सनल मेसेज पाठवताना खास वेळ मी काढला आहे. मला विश्वास होत नाही की,ही तिच स्त्री आहे का,जिच्याकडून सेटवर मी खूप गोष्टी शिकतो,तू खरंच कमाल आहेस. गंगूच्या भूमिकेत तू जादू केलीयस आणि रानीची तुझी व्यक्तिरेखा शूट होताना जवळून पाहिल्यानंतर या सिनेमाला पाहिल्यावर मी असं म्हटलं तर अतिश्योक्ती ठरणार नाही की,कुठल्याही भूमिकेत तू स्वतःला फिट बसवतेस,जसं पाणी ज्या भांड्यात पडेल त्याचा आकार घेतं अगदी तसं. खूप अभिमानास्पद,या देशातील सर्वोत्तम अभिनेत्री''.

आलियानं इब्राहिमचा तो मेसेज वाचल्यावर करण जोहर आणि रणवीर सिंग लोटपोट हसले. इब्राहिम सध्या करण जोहरच्याच 'रॉकी और रानी की प्रेम कहानी' सिनेमासाठी सहाय्यक दिग्दर्शकाचं काम करीत आहे. या सिनेमात रणवीर सिंग आणि आलिया भट्ट मुख्य भूमिकेत आहेत.