अखेर विकीकडून लग्नाच्या चर्चांवर शिक्कामोर्तब; कतरिनाच्या घराबाहेरील Video व्हायरल

अभिनेता विकी कौशल Vicky Kaushal आणि कतरिना कैफ Katrina Kaif खरंच लग्न करणार आहेत का, हा प्रश्न असंख्य चाहत्यांच्या मनात गेल्या काही दिवसांपासून रुंजी घालत होता. आता अखेर विकीनेच लग्नाच्या चर्चांवर शिक्कामोर्तब केल्याचं म्हटलं जात आहे. शुक्रवारी रात्री विकी कतरिनाच्या घरी पोहोचला. त्याचा हा व्हिडीओ सोशल मीडियावर तुफान व्हायरल होत आहे. कारमधून बाहेर पडत विकी कतरिनाच्या इमारतीत जाऊ लागतो. मात्र दोन पावलं पुढे गेल्यावर तो मागे वळून पापाराझींना, फोटोग्राफर्सना नमस्कार करतो. यावेळी त्याने पापाराझींकडे दुर्लक्ष केलं नाही, उलट एका अर्थाने त्यांचे आभार मानले. त्यामुळे विकी आणि कतरिना खरंच लग्नबंधनात अडकणार आहेत, असे कमेंट्स नेटकरी या व्हिडीओवर करू लागले आहेत.

सोशल मीडियावर व्हायरल झालेल्या आणखी एका व्हिडीओमध्ये कतरिनाच्या घरी डिझायनर कपडेसुद्धा येऊ लागल्याचं पहायला मिळत आहे. हे कपडे लग्नसोहळ्यासाठी असल्याचं म्हटलं जात आहे. बॉलिवूडमधील ही सर्वाधिक चर्चेत असलेली जोडी ९ डिसेंबर रोजी जयपूरमध्ये लग्नगाठ बांधणार असल्याचं कळतंय. कतरिना-विकीने त्यांच्या लग्नाबाबत कमालीची गुप्तता पाळली आहे. राजस्थानमधील सिक्स सेन्सेस फोर्ट बरवारा, सवाई माधोपूर याठिकाणी बॉलिवूडमधील हे सर्वांत मोठं लग्न होणार असल्याचं समजतंय.

IANSने दिलेल्या वृत्तानुसार, सवाई माधोपूरच्या जिल्हा प्रशासनाने या भव्य लग्नसोहळ्यापूर्वी बैठकीबाबत आदेश जारी केला आहे. या आदेशाची प्रत सोशल मीडियावर व्हायरल झाली आहे. व्हायरल नोटीसनुसार, हाय-प्रोफाइल लग्नापूर्वी कायदा आणि सुव्यवस्थेवर चर्चा करण्यासाठी बैठक होणार आहे. या बैठकीत सेलिब्रिटींसाठी गर्दी नियंत्रित करण्याच्या उपाययोजना आणि इतर सुरक्षा व्यवस्थेवरही चर्चा होणार आहे.

२०१९ मध्ये एका मित्राच्या दिवाळी पार्टीत विकी आणि कतरिना पहिल्यांदा एकत्र झळकले होते. तेव्हापासून या दोघांच्या रिलेशनशिपच्या चर्चांना उधाण आलं होतं. नवीन वर्षाचं स्वागत करण्यासाठी या दोघांनी एकत्र पार्टी केल्याच्याही चर्चा होत्या. विकी कौशलचा भाऊ सनी कौशलने अलिबागमधल्या सेलिब्रेशनचे फोटो पोस्ट केले होते. तर दुसरीकडे कतरिनाने अलिबागमधील फोटो पोस्ट केले होते. कतरिनाने पोस्ट केलेल्या फोटोंमध्ये मागील काचेवर विकीचं प्रतिबिंब चाहत्यांनी पाहिलं होतं. तो फोटो व्हायरल होताच, कतरिनाने सोशल मीडियावरून तो फोटो डिलिट केला होता. कतरिनाच्या घरी झालेल्या ख्रिसमस पार्टीलाही विकीने हजेरी लावली होती.