'शिल्पाला कोणत्या नरकातून जावं लागलं, याची कल्पना नाही करु शकत'

अश्लील चित्रफित निर्मितीप्रकरणी व्यावसायिक व पती राज कुंद्राला Raj Kundra अटक झाल्याच्या जवळपास महिनाभरानंतर अभिनेत्री शिल्पा शेट्टी Shilpa Shetty कामावर परतली. 'सुपर डान्सर ४' Super Dancer 4 या रिअॅलिटी शोमध्ये दिग्दर्शक अनुराग बासू Anurag Basu आणि कोरिओग्राफर गीता कपूरसोबत शिल्पा परीक्षक म्हणून काम करत आहे. 'सुपर डान्सर ४'च्या सेटवर परतल्यानंतर शिल्पाच्या अवतीभोवती कसं वातावरण होतं, याविषयी अनुराग बासूने नुकत्याच दिलेल्या एका मुलाखतीत सांगितलं.

'झूम'ला दिलेल्या मुलाखतीत अनुराग म्हणाले, "सेटवर शिल्पा परत येताच आम्ही सर्वांनी तिला मिठी मारली. तिला आम्ही कोणतेच प्रश्न विचारले नव्हते. कारण आधीच ती अत्यंत वाईट परिस्थितीचा सामना करून सेटवर परतली होती. तिला कोणत्या नरकातून जावं लागलं, याची कल्पनासुद्धा आपण करू शकत नाही. गीता, मी आणि शिल्पा..आम्हा तिघांमध्ये खूप चांगली मैत्री आहे. सेटवर आमच्यात छोटीमोठी भांडणं पण होतात. पण आम्हाला नेहमीच एकमेकांची काळजी असते. शिल्पा आणि गीतासोबत वेळ घालवायला मला खूप आवडतं आणि त्यामुळेच मी प्रत्येक एपिसोडची आतुरतेने वाट पाहत असतो."

राजला अटक झाल्यानंतर शिल्पा मोठ्या प्रमाणात ट्रोल झाली होती. त्याचा परिणाम शिल्पाच्या सोशल लाईफवर झाल्याचंही दिसून आलं. शिल्पाकडे जे काही रियॅलिटी शो होते त्यातून तिला बाहेर जावं लागलं होतं. राजच्या पॉर्नोग्राफी प्रकरणामुळे तिला त्या पदावरुन माघार घ्यावी लागली होती.