बिग बॉस मराठी ३ लवकरच; महेश मांजरेकरांनी शेअर केला व्हिडीओ

छोट्या पडद्यावरील प्रसिद्ध रिअ‍ॅलिटी शो 'बिग बॉस मराठी'ची लोकप्रियता प्रचंड आहे. या शोमधील स्पर्धक रोजच्या निरनिराळ्या टास्कने प्रेक्षकांचे मनोरंजन करतात. या शोच्या गेल्या दोन्ही सिझनचे सूत्रसंचालन मराठी चित्रपटसृष्टीमधील प्रसिद्ध अभिनेते आणि निर्माते महेश मांजरेकर (mahesh manjrekar) यांनी केले. महेश त्यांच्या सूत्रसंचालनाच्या हटके अंदाजाने प्रेक्षकांची मनं जिंकतात. नुकताच त्यांनी बिग बॉस मराठीच्या (bigg boss marathi season 3) नव्या सिझनचा प्रोमो सोशल मीडियावर शेअर केला. या प्रोमोमुळे प्रेक्षकांमध्ये नव्या सिझनबद्दल उत्सुकता निर्माण झाली आहे. (bigg boss marathi season 3 mahesh manjrekar announcement)

कोरोनामुळे महाराष्ट्रामध्ये मालिका, शो आणि चित्रपटांचे चित्रीकरणाला गेल्या वर्षी मार्च महिन्यापासून बंद होते. त्यामुळे गेल्या वर्षी ‘बिग बॉस मराठी’चा नवा सिझन प्रेक्षकांच्या भेटीला आला नाही. आता चित्रीकरणाला परवानगी मिळाली आहे. बॉलिवूड अभिनेता सलमान खानच्या 'हिंदी बिग बॉस' प्रमाणे 'मराठी बिग बॉस'चे चित्रीकरण देखील कोरोनाचे सर्व नियम पाळून करण्यात येणार आहे. 'त्याच्यासोबत मी परत येतोय… तुम्ही तयार राहा… #BiggBossMarathi3 लवकरच #ColorsMarathi वर' असे कॅप्शन देऊन महेश मांजरेकर यांनी बिग बॉसच्या नव्या सिझनचा प्रोमो सोशल मीडियावर शेअर केला. बिग बॉसच्या इतर सिझन प्रमाणे या नव्या सिझनचे देखील सूत्रसंचालन महेश मांजरेकर करणार आहेत.

बिग बॉसमध्ये 15 स्पर्धक एकत्र राहतात. त्यांच्यामधील मतभेद, धमाल, मस्ती प्रेक्षकांच्या नेहमी पसंतीस पडते. ‘बिग बॉस मराठी’च्या पहिल्या पर्वात अभिनेत्री मेघा धाडे विजेती ठरली होती. तर दुसऱ्या पर्वाचा विजेता शिव ठाकरे झाला. आता या नव्या सिझनमध्ये कोणते स्पर्धक असतील आणि बिग बॉसची ट्रोफी कोण जिंकेल याबद्दल प्रेक्षकांना उत्सुकता आहे.