अरमान कोहलीच्या अडचणीत वाढ! मुंबई हायकोर्टाने नाकारला जामीन

बॉलीवूड अभिनेता अरमान कोहली (Arman Kohli) गेल्या काही दिवसांपासून चांगलाच अडचणीत आल्याचं दिसतं आहे. एनडीपीएस प्रकरणात अरमानला जामीन देण्यास मुंबई उच्च न्यायालयाने नकार दिला आहे. अरमान ऑगस्ट 2021 पासून न्यायालयीन कोठडीत आहे. अरमानला जेव्हा अटक करण्यात आली तेव्हा एनसीबीने (NCB) अरमानवर ड्रग्ज सेवनाचे (Drugs) अनेक मोठे आरोप असल्याचे सांगितले होते. एनसीबीने अरमानला अटक करण्यापूर्वी त्याच्या घरावर छापा टाकला होता. त्यादरम्यान त्याच्या घरातही काही प्रमाणात ड्रग्ज सापडले होते.

एनसीबीने अरमान कोहलीची चौकशी केली तेव्हा त्याला ड्रग्ज सेवनाबद्दल प्रश्न विचारले असता त्याने स्पष्ट उत्तर दिले नाही असंही एनसीबीकडून सांगण्यात आलंय. चौकशीनंतर एनसीबीच्या अधिकाऱ्यांनी अरमान कोहलीला एनसीबी कार्यालयात नेलं. त्यानंतर अरमानला अटक करण्यात आली.

एनसीबीच्या टीमनं १ डिसेंबरला अरमान कोहलीच्या घरी छापा टाकला होता. त्यानंतर त्याची चौकशीही करण्यात आली. आणि त्याला ताब्यात घेण्यात आले. यानंतर बॉलीवूडमध्ये खळबळ उडाली आहे. एनसीबीच्या अशा धडक कारवाईमुळे बॉलीवूडमध्ये चिंतेचे वातावरण आहे. बॉलीवू़डचा दिवंगत अभिनेता सुशांतसिंग राजपूतच्या आत्महत्येनंतर बॉलीवूडमधील ड्रग्ज प्रकरण समोर आले होते. त्यावेळी अनेक मोठमोठ्या सेलिब्रेटींची नावं उजेडात आली होती. अखेर कित्येक सेलिब्रेटींनी प्रेक्षकांना आवाहन करुन आपली बदनामी न करण्यास सांगितले होते. त्यासंबंधी काही पोस्टही व्हायरल केल्या होत्या.