‘दादासाहेब फाळके’ पुरस्कार विजेते कला दिग्दर्शक लीलाधर सावंत आर्थिक संकटात

कोरोना काळात अनेक क्षेत्रांना आर्थिक फटका बसला. तसेच कलाक्षेत्राला देखील आर्थिक संकटाला सामोरे जावे लागत आहे. अनेक हिंदी चित्रपटांचे कला दिग्दर्शन करणारे दिग्दर्शक लीलाधर सावंत (Liladhar Sawant) यांचे कुटुंब सध्या आर्थिक विवंचनेत आहे. लीलाधर यांच्या पत्नी पुष्पा यांनी एएनआय वृत्त संस्थेला दिलेल्या मुलाखतीमध्ये सांगितले की, 'लीलाधर यांच्या दोन बायपास सर्जरी झाल्या असून त्यांना दोनदा ब्रेन हॅमरेजचे अटॅक आले आहेत. त्यामुळे त्यांच्या उपचारांवर सर्व पैसे खर्च झाले आहेत. दरम्यान लीलाधर यांना आता बोलणंही शक्य होत नाही.' (Financial crisis on the family of Dadasaheb Phalke award winning director Liladhar Sawant wife urges celebrity for help)

पुष्पा यांनी मुलाखतीत त्यांचे कुटुंब सध्या खडतर आयुष्य जगत असल्याचं सांगितलं आहे. यावेळी पुष्पा यांनी चित्रपटसृष्टीतील कलाकारांकडे मदतीची याचना केली आहे. ज्या कलाकारांनी लीलाधर यांच्यासोबत काम केलंय त्यांनी मदतीसाठी पुढे यावं असं पुष्पा सावंत म्हणाल्या. ‘हत्या’ या सिनेमासाठी लीलाधर यांनीच गोविंदाचं नाव सुचवलं होतं असं पुष्पा यांनी या मुलाखतीत सांगितलं. “सध्या आम्ही दोघं कठीण काळात असून मुश्किलीने आमचं जीवन व्यतीत करत आहोत.” असं पुष्पा म्हणाल्या. लीलाधर सावंत यांना ‘दादासाहेब फाळके’ पुरस्काराने सन्मानित करण्यात आलं आहे.

लीलाधर सावंत यांनी ‘हत्या’, ‘110 डेज’, ‘दीवाना’, ‘हद कर दी आपने’ यांसारख्या जवळपासस १७७ सिनेमांसाठी कला दिग्दर्शन केलंय. त्यांना आजवर दादासाहेब फाळके तसंच फिल्मफेअर आणि इतर काही पुरस्कार मिळाले आहेत.