Gautami Patil : नवरात्रोत्सवात गौतमी पाटीलचा जलवा; कार्यक्रमासाठी पाच हजारावर महिला उपस्थित

गंगापूर : प्रसिद्ध नृत्यांगणा गौतमी पाटील (Gautami Patil) आणि राडा असं नवं समीकरण तयार होत असतानाच गंगापूर (Gangapur) शहरात सार्वजनिक दुर्गा माता उत्सव समितीच्या वतीने आयोजित कार्यक्रम नियोजनबद्ध शांततेत पार पडल्याने शेकडो रसिकांनी कार्यक्रमाचा आनंद घेतला.

तरुण वर्गासह महिला मंडळाने मोठ्या संख्येने लावणी पाहण्यासाठी गर्दी केली होती. कार्यक्रमाचे (Navratri Festival) उद्घाटन माजी नगराध्यक्ष फैसल चाउस यांच्या हस्ते झाले. उत्सव समितीच्या अध्यक्ष सुवर्णा जाधव, माजी नगराध्यक्ष संजय जाधव यांच्या संकल्पनेतून कार्यक्रमाचे आयोजन करण्यात आले होते.

गौतमी पाटीलचा डान्स (Marathi Lavani) सुरू झाल्यानंतर तरुणांनी शिट्ट्या वाजवत आणि 'सबसे कातिल गौतमी पाटील'च्या घोषणा द्यायला सुरुवात केली. याशिवाय काही तरुणांनी मंडपातच भन्नाट डान्स करायला सुरुवात केली. त्यामुळं अनेकांनी या मजेशीर कार्यक्रमाचा आनंद लुटला. अतिउत्साही तरुण गौतमी पाटीलला पाहण्यासाठी व्यापारी गळ्यावर व झाडावर चढले होते.

कार्यक्रमाच्या यशस्वीतेसाठी प्रसिद्ध व्यापारी संतोष अंबिलवादे, रामेश्वर नावंदर, सुरेश नेमाडे, संदीप साबणे, सोपान देशमुख, योगेश पाटील, शरद दारुंटे यांनी यशस्वी प्रयत्न केले. संयोजन समितीची अध्यक्षा सुवर्णा जाधव यांनी आभार मानले. पोलिस निरीक्षक सत्यजित ताईतवाले यांच्या मार्गदर्शनात पोलिसांनी चोख बंदोबस्त ठेवल्याने काही अनुचित प्रकार घडला नाही.

रात्रीचा स्वयंपाक लवकर आटोपून महिलांची हजेरी

गौतमी पाटीलचा कार्यक्रम बघण्यासाठी शहरातील पाच हजारावर महिलांनी उत्स्फूर्तपणे सहभाग नोंदविला. विशेष म्हणजे, सायंकाळी सात वाजता कार्यक्रम असताना महिला मंडळी रात्रीचा स्वयंपाक करूनच घराबाहेर पडल्या. आयोजकातर्फे महिलांना कूपण वाटप केले होते. त्यानुसार सात भाग्यवान महिलांना बक्षिस वितरित करण्यात आले. या कार्यक्रमाची व्हिडिओ लिंक देखील व्हायरल करण्यात आली होती. शेकडो प्रेक्षकांनी घरात बसून देखील कार्यक्रमाचा आस्वाद घेतला.