अखेर 'शनाया'च्या लग्नाचा फोटो आला समोर

'माझ्या नवऱ्याची बायको' या मालिकेत शनायाची भूमिका साकारून घराघरात पोहोचलेली अभिनेत्री रसिका सुनील हिने १८ ऑक्टोबर रोजी लग्नगाठ बांधून चाहत्यांना सुखद धक्का दिला. गोव्याच्या समुद्रकिनारी रसिकाने प्रियकर आदित्य बिलागीशी लग्न केलं. या दोघांनी लग्नाचा एक ब्लॅक अँड व्हाईट फोटो सोशल मीडियावर पोस्ट केला होता. मात्र त्यामध्ये दोघांचा लूक स्पष्टपणे दिसत नव्हता. अखेर आता त्यांनी लग्नाचा आणखी एक फोटो पोस्ट केला आहे. यावर चाहते आणि सेलिब्रिटींकडून कमेंट्स आणि लाईक्सचा वर्षाव होत आहे. यामध्ये रसिकाने पिवळ्या रंगाची नऊवारी साडी तर आदित्यने निळ्या आणि सोनेरी रंगाची शेरवानी परिधान केली आहे. समुद्रकिनारा, सूर्यास्ताची वेळ आणि नवविवाहित रसिका-आदित्य यांच्या या फोटोने नेटकऱ्यांचं लक्ष वेधलं आहे.

'तेरे मेरे बीच मे क्या है', असं कॅप्शन देत या दोघांनी हा खास फोटो पोस्ट केला आहे. याआधीच्या आणखी एका फोटोमध्ये या दोघांचा साखरपुड्याचा लूक पहायला मिळतोय. यामध्ये रसिकाने गुलाबी रंगाची साडी परिधान केली आहे. तर हळदीच्या कार्यक्रमात या दोघांनीही दाक्षिणात्य पद्धतीचा लूक केला होता. आदित्यने रसिकाला उचलून घेतल्याचा हा फोटो सोशल मीडियावर व्हायरल झाला होता. शाहरुख खानच्या 'चेन्नई एक्स्प्रेस'मधील एका दृश्यासोबत या फोटोचे मीम्ससुद्धा तयार करण्यात आले आहेत.

दोन वर्षांपूर्वी रसिका 'माझ्या नवऱ्याची बायको' ही मालिका सोडून लॉस एंजिलिसला पुढील शिक्षणासाठी गेली होती. तिथे तिची आदित्यशी ओळख झाली. १ जानेवारी रोजी नवीन वर्षाच्या शुभेच्छा देत असतानाच रसिकाने तिचं रिलेशनशिप जाहीर केलं होतं. ‘सर्वांना नवीन वर्षाच्या शुभेच्छा. २०२० या वर्षभरात अनेक वाईट घडामोडी घडल्या असल्या तरी कृतज्ञ राहण्यासाठी या वर्षाने अनेक कारणं दिली आहेत’, असं कॅप्शन देत तिने आदित्यसोबतचा रोमँटिक फोटो पोस्ट केला होता.