Indian Idol 12: सायली कांबळे 'या' व्यक्तीला करतेय डेट

'इंडियन आयडॉल'चं बारावं Indian Idol 12 पर्व चांगलंच गाजलं. हे पर्व काही दिवसांपूर्वीच संपलं. मात्र त्यातील स्पर्धक अजूनही प्रेक्षकांच्या चांगलेच लक्षात आहेत. आपल्या गायनकौशल्याने या शोमधील स्पर्धकांनी प्रेक्षकांच्या मनावर विशेष छाप सोडली. आता सोशल मीडियावर या शोमधील स्पर्धक सायली कांबळे Sayli Kamble तिच्या खासगी आयुष्यामुळे चर्चेत आहे. सायलीने नुकताच तिच्या प्रियकरासोबतचा फोटो सोशल मीडियावर शेअर केला आहे. शोमध्ये असताना तिचं नाव निहालसोबत जोडलं गेलं होतं. आता सायलीने तिच्या खऱ्या प्रियकरासोबतचा फोटो पोस्ट करत निहालसोबतच्या अफेअरच्या चर्चांना पूर्णविराम दिला आहे.

प्रियकर धवलसोबतचा रोमँटिक फोटो पोस्ट करत सायलीने कॅप्शनमध्ये प्रेमाची कबुली दिली आहे. 'चलो जी साफ साफ कहती हूँ, इतनी सी बात है.. मुझे तुमसे प्यार है' या गाण्याच्या ओळी तिने कॅप्शनमध्ये लिहिल्या आहेत. सायलीने हा फोटो पोस्ट करताच सोशल मीडियावर तो वाऱ्याच्या वेगाने व्हायरल झाला आहे. तिच्या या फोटोवर अनेकांनी कमेंट्स करत तिला शुभेच्छा दिल्या आहेत. इंडियन आयडॉल १२च्या स्पर्धकांनीही सायलीच्या फोटोवर कमेंट करत तिला शुभेच्छा दिल्या आहेत. अंजली गायकवाड, स्पृहा जोशी यांनी कमेंट्समध्ये हृदयाचे इमोजी पोस्ट केले आहेत. या पर्वाच्या अंतिम सोहळ्यात सायलीने तिसरं स्थान पटकावलं होतं. शोमध्ये तिच्या गायनाचं खूप कौतुक झालं होतं.

'इंडियन आयडॉल १२' विविध कारणांमुळे सतत चर्चेत होतं. या शोमध्ये हजेरी लावणाऱ्या पाहुण्या कलाकारांना स्पर्धकांचं कौतुक करायला सांगितल्याचे आरोप निर्मात्यांवर करण्यात आले होते. सूत्रसंचालक आदित्य नारायणने या आरोपांना सडेतोड उत्तर दिलं होतं.