काजल अगरवालने केला आजाराचा खुलासा; चाहत्यांना केली विनंती

दाक्षिणात्य चित्रपटसृष्टीसोबतच बॉलिवूडमध्येही आपली वेगळी ओळख निर्माण करणारी अभिनेत्री काजल अगरवाल हिने सोशल मीडियावर स्वत:विषयी एक खुलासा केला. वयाच्या पाचव्या वर्षापासून अस्थमा असल्याचं तिने या पोस्टद्वारे सांगितलं. त्याचप्रमाणे चाहत्यांना एक विनंतीसुद्धा केली. 

काय आहे काजलची पोस्ट?
'वयाच्या पाचव्या वर्षी, मला ब्रॉन्किअल अस्थमा असल्याचं निदान झालं. यामुळे सर्वांत आधी माझ्या खाण्यापिण्यावर बंधनं आली. मी दुग्धजन्य पदार्थ आणि चॉकलेट खाऊ शकत नव्हती. मोठी झाल्यानंतरही फार काही बदल झाले नाही. प्रत्येक वेळी प्रवास करताना, हिवाळ्यात किंवा धूळ आणि धूराच्या संपर्कात आल्यावर अस्थमाची लक्षणं आणखी वाढायची. यापासून स्वत:ला वाचवण्यासाठी सर्वोत्तम मार्ग मला इनहेलर्सद्वारे मिळाला. मी इनहेलर्स वापरायला सुरुवात केली आणि लगेच फरक जाणवू लागला.'

हेही वाचा : हर्षदा खानविलकरच्या घरी आस्ताद-स्वप्नालीचं केळवण; पाहा फोटो

या पोस्टच्या माध्यमातून काजलने इनहेलर्सविषयी जनजागृती केली. 'आता मी बाहेर जाताना इनहेलर्स आवर्जून सोबत घेते. माझ्या हातात इनहेलर्स पाहून अनेकांना प्रश्न पडतो. आपल्या देशात असे अनेक लोक आहेत जे इतरांचा विचार करून इनहेलर्स वापरत नाही. पण इनहेलर्स वापरताना कोणतीही लाज बाळगण्याची गरज नाही. मी माझ्या मित्रमैत्रिणींना, फॉलोअर्सना विनंती करते की त्यांनीसुद्धा अस्थमा आणि इनहेलर्सच्या वापराविषयी जनजागृती करावी आणि सकारात्मकता पसरवावी', असं ती म्हणाली.