लग्नमंडपात गुलाबी रंगाच्या लेहंग्यामध्ये दिसली नववधू कतरिना...

ज्या लग्नानं गेले काही महिने वर्तमानपत्र,दृकश्राव्य माध्यम ते सोशल मीडियापर्यंत सगळ्याच माध्यमांवर कब्जा केला होता ते अखेर आज राजस्थानमधील ऐतिहासिक गडकिल्ल्यांच्या साक्षीनं पार पडलं म्हणायचं. कतरिना कैफ(Katrina Kaif) आणि विकी कौशल(Vicky Kaushal) हे बॉलीवूडचे दोन नामवंत कलाकार लग्नाच्या बेडीत अडकले एकदाचे. त्यांनी आपल्या लग्नावर काहीही भाष्य केलं नसलं तरी लग्नाची बित्तंबातमी समोर आलीच. इतकंच काय लग्नामध्ये आलेल्या पाहुण्यांपासून सगळ्यांनाच फोन वापरण्यावर बंदी करूनही कतरिनाचा लूक समोर आलाच म्हणायचा.

सूत्रांच्या माहितीनुसार कतरिनाने 'सब्यासाची'नं डिझाईन केलेला गुलाबी रंगाचा लेहंगा परिधान केल्याचं कळतंय. वर-वधूची मंडपातील एंट्रीही खूप झकास झाली असं म्हटलं जातंय. कतरिनाला ज्या डोलीमधनं मंडपापर्यंत आणलं गेलं ती डोली भरगच्च रंगबिरंगी फुलांनी सजवली होती अशीही माहिती समोर येतेय. तर किल्ल्यातला जो 'शीश महल' हा महत्त्वाचा आणि सर्वात आकर्षक असा दर्शनीय भाग असतो तिथे लग्नाचा मंडप बांधण्यात आला होता. आणि याच देखण्या मंडपात आरपसपानी सौंदर्याची कतरिना अखेर मिसेस.विकी-कौशल झाली.

गेल्या काही वर्षांत अनुष्का,दिपिका,प्रियंका अशा बड्या अभिनेत्रींनी लग्न केलं. त्यावेळी त्यांनी लग्नात घातलेला लेहंगा हे मुख्य आकर्षण होतं. या प्रत्येकीची लग्नाच्या त्या खास लेहंग्यासाठी चॉईस होती ती 'सब्यासाची' कलेक्शनलाच. आता कतरिनानंही त्याच 'सब्यासाची' वेडिंग कलेक्शनचा खास गुलाबी रंगाचा लेहंगा आपल्या लग्नात घातला त्यामुळे अर्थात तिचंही रुप खुलून आलं असणार हे नक्की.