Khatron Ke Khiladi 12 : ‘या’ स्पर्धकाने जिंकला शो; दिसला कारच्या चावीसह

Khatron Ke Khiladi 12 Latest News ‘खतरो के खिलाडी १२’चा फिनाले रविवारी रात्री मुंबईत शूट झाला. फिनालेचा हा भाग पुढील आठवड्यात टीव्हीवर प्रसारित होणार आहे. स्टंट्ससोबतच स्पर्धकांचा डान्स परफॉर्मन्सही एपिसोडमध्ये दाखवण्यात येणार आहे. रोहित शेट्टीच्या (Rohit Shetty) आगामी ‘सर्कस’ या चित्रपटातील अभिनेता रणवीर सिंग आणि वरुण शर्मा देखील फिनालेमध्ये दिसणार आहेत. आता विजेत्याच्या नावाची चर्चा सुरू झाली आहे. सीझन १२ चा विजेता कोण ठरला हे प्रत्येकजण जाणून घेण्याचा प्रयत्न करीत आहे.

‘खतरो के खिलाडी १२’चा विजेते म्हणून फैजल शेख म्हणजेच मिस्टर फैजूचे नाव पहिल्यांदा समोर आले होते. आता ताजे अपडेट म्हणजे हा स्टंट आधारित रिॲलिटी शो तुषार कालियाने जिंकला आहे. होय, तुषार सोशल मीडियावर सतत ट्रेंड करीत आहे. चाहते त्याचे अभिनंदन करीत आहेत. ‘खतरो के खिलाडी’च्या अनेक फॅन पेजवरून तुषारने ट्रॉफी जिंकल्याचे शेअर केले आहे. अधिकृतपणे विजेत्याचे नाव पुढच्या आठवड्यातच जाहीर केले जाईल.

फिनाले शूटच्या रात्री उशिरा तुषार पापाराझींसमोर दिसला. विजेत्याला द्यायची असलेल्या कारची चावी तुषारकडे दिसली. त्यानंतर तो शो जिंकल्याची चर्चा जोरात सुरू झाली. फैजल आणि तुषार टॉप २ मध्ये पोहोचल्याचे फार पूर्वीच समोर आले होते.

टीव्हीवर प्रसारित झालेल्या एपिसोडमध्ये ४ स्पर्धक फायनल झाल्याचे दाखवण्यात आले आहे. तुषार कालिया आधीच तिकीट टू फिनालेच्या माध्यमातून फायनलिस्ट झाला होता. त्याच्याशिवाय रुबिना दिलीक, जन्नत जुबेर आणि फैजल शेख हे टॉप ४ मध्ये पोहोचण्यात यशस्वी ठरले.